Finlyandiya Fin qo‘ltig‘ining sharqiy qismida havo va dengiz yo‘llarini yopdi
Mazkur chora Rossiyaning shimoli-g‘arbiy hududlariga uyushtirilgan dron hujumlari ortidan qo‘llanildi.
Finlyandiya Rossiyaning shimoli-g‘arbiy hududlariga uchuvchisiz uchish apparatlari hujumlari fonida Fin qo‘ltig‘ining sharqiy qismida havo va dengiz qatnoviga vaqtinchalik cheklovlar joriy etdi. Bu haqda mamlakat Mudofaa kuchlari ma’lum qildi, deya xabar bermoqda Kommersant.
Qayd etilishicha, cheklovlar shanba kuni erta tongda ehtiyot chorasi sifatida kuchga kirgan. Shu bilan birga, Rossiyaga dronlar hujumi amalga oshirilgan kechada Finlyandiya Harbiy-havo kuchlari ham jangovar shay holatga keltirilib, harbiy samolyotlar havoga ko‘tarilgan.
Finlyandiya Bosh shtabining aloqa departamenti vakili Yere Paldaniusning Helsingin Sanomat nashriga ma’lum qilishicha, cheklovlar Rossiyaga uyushtirilgan dron hujumlari sabab joriy etilgan.
Uning so‘zlariga ko‘ra, zarurat tug‘ilganda fuqarolar xavfsizligini ta’minlash hamda vakolatli organlarning samarali harakat qilishi uchun havo kuzatuvi kuchaytirilgan.
Bu Finlyandiyaning Fin qo‘ltig‘i ustida qisqa muddat ichida joriy etgan ikkinchi cheklovi bo‘ldi. Mamlakat avval ham 2-iyul kuni ushbu hududda havo va dengiz qatnoviga vaqtinchalik cheklovlar kiritgan edi.
Ayni kuni Rossiyaning Sankt-Peterburg shahri keng ko‘lamli dronlar hujumiga uchradi. Rossiya ma’lumotlariga ko‘ra, 72 ta uchuvchisiz uchish apparati urib tushirilgan. Shaharning Kirov tumanidagi neft terminaliga zarba berilgan, urib tushirilgan dronlardan biri esa Petergof hududiga qulagan. Hodisa oqibatida jabrlanganlar haqida ma’lumot berilmagan.
