Toshkentdagi “O‘rikzor” bozorida yong‘in sodir bo‘ldi
Hozirda yong‘in sababi va keltirilgan moddiy zarar miqdori aniqlanmoqda.
Bugun, 4-iyul kuni Toshkent shahrining Uchtepa tumanida joylashgan “O‘rikzor” bozoridagi do‘konlardan birida yong‘in yuz berdi.
Toshkent shahar Favqulodda vaziyatlar bosh boshqarmasi ma’lumotiga ko‘ra, hodisa yuzasidan chaqiruv soat 04:26 da kelib tushgan. Yong‘in-qutqaruv ekipajlari voqea joyiga soat 04:35 da yetib borib, yong‘inni 04:48 da qurshab olgan hamda 05:01 da to‘liq bartaraf etgan.
Dastlabki ma’lumotlarga ko‘ra, yong‘in oqibatida oziq-ovqat do‘konining taxminan 150 kvadrat metr maydoni yonib zararlangan.
Qayd etilishicha, hodisa oqibatida jabrlanganlar yo‘q.
Ayni paytda yong‘inning kelib chiqish sabablari hamda yetkazilgan moddiy zarar miqdorini aniqlash ishlari olib borilmoqda.
