Shayxontohur tumanidagi ikki qavatli do‘konda yong‘in sodir bo‘ldi
Yong‘in oqibatida do‘konning ikkinchi qavatidagi ichki qismi zararlangan. Hodisa oqibatida tan jarohati olgan yoki halok bo‘lganlar yo‘q.
5-iyul kuni soat 21:15 atrofida Toshkent shahrining Shayxontohur tumani Beshqo‘rg‘och ko‘chasida joylashgan ikki qavatli do‘konning ikkinchi qavatida yong‘in sodir bo‘ldi. Bu haqda Toshkent shahar Favqulodda vaziyatlar bosh boshqarmasi ma’lum qildi.
Xabarga ko‘ra, voqea joyiga yong‘in-qutqaruv ekipajlari soat 21:24 da yetib borgan. Yong‘in qisqa vaqt ichida qurshab olinib, soat 21:34 da to‘liq bartaraf etilgan.
Dastlabki ma’lumotlarga ko‘ra, yong‘in oqibatida do‘konning ikkinchi qavatidagi ichki qism 80 kvadrat metr maydonda yonib zararlangan.
Hodisa oqibatida tan jarohati olgan yoki halok bo‘lganlar yo‘q. Yong‘inning kelib chiqish sababi va yetkazilgan moddiy zarar miqdori aniqlanmoqda.
