Samarqandda transport sohasiga bag‘ishlangan "Milliy sanoat zanjiri" ko‘rgazmasi o‘tkaziladi
Tadbir 15–16-iyul kunlari Jomboy tumanidagi "Sof Expo" ko‘rgazma markazida bo‘lib o‘tadi.
Joriy yilning 15–16-iyul kunlari Samarqand viloyati Jomboy tumanidagi "Sof Expo" ko‘rgazma markazida transport sohasiga bag‘ishlangan "Milliy sanoat zanjiri" ko‘rgazmasi bo‘lib o‘tadi.
Ko‘rgazma Sanoat kooperatsiyasi va davlat xaridlari agentligi, Transport vazirligi hamda transport sohasidagi yirik davlat buyurtmachilari va tarmoq korxonalari hamkorligida tashkil etilmoqda.
"Milliy sanoat zanjiri" ko‘rgazmalari yirik davlat va korporativ buyurtmachilarning ehtiyojlari asosida mahalliy ishlab chiqarishni rivojlantirish, sanoat kooperatsiyasini kengaytirish hamda yangi ishlab chiqarish loyihalarini shakllantirishga xizmat qiluvchi doimiy platforma hisoblanadi.
Mazkur platformaning amaliy natijalari joriy yil may oyida Ohangaronda o‘tkazilgan Tog'-kon va metallurgiya sohasiga bag'ishlangan ilk ko‘rgazmada ham o‘z aksini topdi. Yakuniga ko‘ra 2,7 trillion so‘mlik qo‘shimcha kelishuv va shartnomalarga erishildi, qariyb 1 milliard dollarlik mahsulotlarni mahalliylashtirish bo‘yicha istiqbolli loyihalar shakllantirildi.
Navbatdagi ko‘rgazmada transport sohasidagi yirik davlat buyurtmachilarining amaldagi va istiqboldagi xarid ehtiyojlari taqdim etiladi. Mahalliy ishlab chiqaruvchilar esa o‘z mahsulotlari, butlovchi qismlari, texnologik yechimlari hamda import o‘rnini bosuvchi ishlanmalarini namoyish etish imkoniga ega bo‘ladi.
Tadbir doirasida davlat xaridlari, mahalliylashtirish, sanoat kooperatsiyasi, logistika va investitsiyalar yo‘nalishlarida amaliy uchrashuvlar, shuningdek, B2B va B2G formatidagi muloqotlar ham tashkil etilishi rejalashtirilgan.
Ko‘rgazmada ishtirok etish uchun ro‘yxatdan o‘tish boshlangan. Tadbir 15–16-iyul kunlari Samarqand viloyati Jomboy tumanidagi "Sof Expo" ko‘rgazma markazida bo‘lib o‘tadi.
