Toshkent metrosida poyezdlar harakatida uzilish kuzatildi
“Paxtakor” bekatida odam haddan tashqari ko‘payib ketganidan havo isib, yo'lovchilardan ayrimlarining mazasi qochgan.
9-iyul kuni soat 20:02 atrofida Chilonzor yo‘nalishida "Xalqlar do‘stligi" va "Paxtakor" metro bekatlari oralig‘ida harakatlanayotgan eski turdagi poyezdda texnik nosozlik aniqlandi. Bu haqda “Toshkent metropoliteni” DUK xabar berdi.
Ma’lum qilinishicha, xavfsizlikni ta’minlash maqsadida yo‘lovchilar poyezddan tushirilgan, nosoz tarkib esa boshqa poyezd yordamida texnik ko‘rik yo‘lagiga olib ketilgan. Shu sababli Chilonzor yo‘nalishida poyezdlar harakati taxminan 8 daqiqaga to‘xtab qolgan.
“Hozirgi vaqtda metropolitenning barcha yo‘nalishlarida poyezdlar belgilangan harakat jadvali asosida qatnovni davom ettirmoqda. Yo‘lovchilarimizdan yuzaga kelgan vaqtinchalik noqulaylik uchun uzr so‘raymiz”, deyiladi xabarda.
Voqea joyida bo‘lgan Zamon.uz muxbiriga ko‘ra, texnik uzilish kuzatilgach, “Paxtakor” bekatida odam haddan tashqari ko‘payib ketganidan havo isib, yo'lovchilardan ayrimlarining mazasi qochgan.
