"Qamchiq" dovonida Lacetti yonib ketdi
Haydovchi boshqaruvni yo‘qotishi oqibatida avtomobil yo‘l chetidagi temir to‘siqqa urilgan. U o‘z vaqtida mashinani tark etib, xavfsiz joyga chiqqan.
"Qamchiq" dovonidan o‘tuvchi A-373 avtomobil yo‘lida harakatlangan Lacetti rusumli yengil avtomobilda yong‘in sodir bo‘ldi. Bu haqda “Qamchiq” maxsus qutqaruv boshqarmasi xabar berdi.
Ma’lum qilinishicha, 11-iyul kuni soat 17:50 da "Qamchiq" maxsus qutqaruv boshqarmasiga "Toshkent–Vodiy" yo‘nalishida harakatlanayotgan avtomobilda yong‘in chiqqani haqida xabar kelib tushgan.
Dastlabki ma’lumotlarga ko‘ra, haydovchi boshqaruvni yo‘qotib, avtomobil yo‘l chetidagi temir to‘siqqa urilgan. To‘qnashuv natijasida transport vositasining elektr tizimida qisqa tutashuv yuzaga kelib, kichik ko‘lamdagi yong‘in kelib chiqqan.
Qayd etilishicha, avtomobilda yolg‘iz bo‘lgan haydovchi o‘z vaqtida mashinani tark etib, xavfsiz joyga chiqqan. Voqea joyiga yetib borgan "Qamchiq" maxsus qutqaruv boshqarmasi xodimlari yong‘inni qisqa fursatda to‘liq o‘chirgan.
Hozirda yong‘in kelib chiqish sabablari hamda yetkazilgan moddiy zarar miqdori aniqlanmoqda. Hodisa oqibatida tan jarohati olganlar qayd etilmagan.
