Xitoydagi poyabzal fabrikasida yuz bergan yong‘inda 28 kishi halok bo‘ldi
Kompaniya egasi va yana bir necha mansabdor shaxs beparvolikda gumonlanib hibsga olingan.
Xitoyning Fujyan provinsiyasidagi Jinjiang okrugida joylashgan Huiteng Shoes poyabzal fabrikasida yuz bergan yirik yong‘in oqibatida 28 kishi halok bo‘ldi.
Sinxua axborot agentligi xabariga ko‘ra, yong‘in sodir bo‘lgan vaqtda korxonada 237 nafar ishchi hamda 2 nafar yetkazib beruvchi xodim bo‘lgan.
Yong‘in va qutqaruv boshqarmasi ma’lumotiga ko‘ra, hodisa yuz bergach, 213 nafar fuqaro evakuatsiya qilingan. Ulardan ikki nafari shifoxonada vafot etgan. Avval bedarak yo‘qolgan deb hisoblangan yana 26 kishining halok bo‘lgani keyinchalik tasdiqlangan. Shu tariqa qurbonlar soni 28 nafarga yetgan.
Yong‘inni bartaraf etish ishlariga 500 nafardan ortiq o‘t o‘chiruvchi jalb etilgan. Hodisa oqibatlarini bartaraf etish, yong‘in sabablarini aniqlash hamda aybdorlarni javobgarlikka tortish maqsadida Fujyan provinsiyasi ma’muriyati tomonidan maxsus tergov guruhi tuzilgan.
Dastlabki tergov natijalariga ko‘ra, kompaniya egasi va yana bir necha mansabdor shaxs beparvolikda gumonlanib hibsga olingan. Shuningdek, korxonaning bank hisobvaraqlari muzlatilgan.
Hozirda yong‘inning kelib chiqish sabablari yuzasidan tergov harakatlari davom ettirilmoqda.
Eslatib o‘tamiz, avvalroq Xitoyning janubiy hududlarida “Maysak” tropik bo‘roni oqibatida yuzaga kelgan kuchli suv toshqinlari natijasida 39 kishi halok bo‘lgani haqida xabar berilgandi.
