Хитойда “Майсак” тропик бўрони оқибатида 39 киши ҳалок бўлди
Ҳудудларда ёғингарчилик миқдори 90 сантиметргача етган.
Хитойнинг жанубий ҳудудларида кузатилган “Майсак” тропик бўрони сабаб юзага келган кучли тошқинлар оқибатида 39 киши ҳалок бўлди. Қурбонларнинг 26 нафари Гуангси автоном районининг Наннин шаҳрида қайд этилган. Бу ҳақда Синхуа ахборот агентлиги хабар берди.
Маҳаллий ҳокимият маълумотларига кўра, кучли ёғингарчилик натижасида тўғонлардан бири ёрилиб кетган. 8 мингдан ортиқ мутахассис, қарийб 5 700 та қайиқ ва дронлар ичимлик суви ҳамда бошқа зарур ёрдам воситаларини етказиш, шунингдек, сув тошқини оқибатида қамалиб қолган аҳолини хавфсиз ҳудудларга олиб чиқиш учун қутқарув операцияларига жалб этилган ва 130 мингга яқин киши эвакуация қилинди.
Ҳенгжоудаги бир неча шаҳар ва қишлоқларда чиқиндиларни тозалаш ҳамда ҳудудларни дезинфекция қилиш, йўлларни таъмирлаш ишлари ҳам олиб борилмоқда. Ҳозирга қадар 60 мингдан ортиқ хонадоннинг электр таъминоти қайта тикланган.
Тошқин оқибатида Гуанси провинциясидаги Гуиган ҳайвонот боғи ҳам зарар кўрганлиги маълум қилинган. Сув тошқини ҳайвонлар сақланадиган жойларга шикаст етказгани сабаб камида 100 та ҳайвон қочиб кетган. Хитой Миллий метеорология маркази маълумотига кўра, ҳудуднинг айрим қисмларида ёғингарчилик миқдори 10–40 сантиметрни ташкил этган бўлса, энг кўп зарар кўрган ҳудудларда бу кўрсаткич 90 сантиметргача етган. Синоптиклар яқин кунларда яна кучли ёмғирлар давом этиши мумкинлигини маълум қилган.
