AQSh Eronning qurol ishlab chiqarish quvvatining 84 foizini yo‘q qildi
AQSh prezidenti Eron harbiy sanoatiga katta zarar yetkazilganini ta’kidladi.
AQSh prezidenti Donald Tramp Eronning qurol ishlab chiqarish quvvatining qariyb 84 foizi yo‘q qilinganini ma’lum qildi.
Newsmax telekanaliga bergan intervyusida Tramp AQShning Eron hududiga bergan zarbalari natijasida Tehron qurol ishlab chiqarish salohiyatiga jiddiy putur yetganini ta’kidlagan.
Uning so‘zlariga ko‘ra, Eron qurol ishlab chiqarish imkoniyatini deyarli yo‘qotgan.
“Ular qurol ishlab chiqarish qobiliyatini deyarli yo‘qotdi. Gap taxminan 84 foiz ishlab chiqarish quvvatining yo‘q qilingani haqida ketmoqda”, — degan Tramp.
AQSh prezidenti, shuningdek, ikki tomon o‘rtasidagi harbiy harakatlar davom etayotganini qayd etgan. Uning aytishicha, Eron yuklarini tashuvchi kemalarga nisbatan Hormuz bo‘g‘ozida cheklovlar joriy etiladi, biroq boshqa davlatlarning tankerlariga ushbu dengiz yo‘lagi orqali erkin harakatlanishga ruxsat beriladi.
Trampning mazkur bayonotlari yuzasidan Eron rasmiylari hozircha rasmiy munosabat bildirmagan.
