Qoraqalpog‘iston va Xorazmdan so‘ng Navoiyda ham bog‘chalar yopilmoqda
Havo harorati 44–45 darajagacha ko‘tarilishi kutilayotgani sabab davlat bog‘chalari 14–17-iyul kunlari faoliyatini to‘xtatadi.
Navoiy viloyatining ayrim hududlarida davlat maktabgacha ta’lim tashkilotlari faoliyati vaqtincha to‘xtatiladi.
Viloyat Maktabgacha va maktab ta’limi boshqarmasi ma’lum qilishicha, havo haroratining 44–45 darajagacha ko‘tarilishi kutilayotgani munosabati bilan 14–17-iyul kunlari Uchquduq va Nurota tumanlaridagi, shuningdek Tomdi hamda Konimex tumanlarining ayrim davlat maktabgacha ta’lim tashkilotlari faoliyati vaqtincha to‘xtatiladi.
Qayd etilishicha, mazkur qaror maktabgacha yoshdagi bolalarning hayoti va salomatligini muhofaza qilish maqsadida qabul qilingan.
Davlat bog‘chalari faoliyati 20-iyuldan odatiy tartibda tiklanadi.
Shuningdek, viloyatning qolgan hududlaridagi davlat bog‘chalarida sanitariya-gigiyena talablari va zarur shart-sharoitlar yuzasidan o‘rganish ishlari davom etmoqda. Tekshiruv yakunlariga ko‘ra qo‘shimcha ma’lumot berilishi bildirilgan.
Eslatib o‘tamiz, avvalroq jazirama issiq sabab Qoraqalpog‘iston Respublikasi va Xorazm viloyatidagi davlat maktabgacha ta’lim tashkilotlari faoliyati ham vaqtincha to‘xtatilgani ma’lum qilingan.
