Jazirama kunlarda ochiq havodagi ishlarni 11:00–16:00 oralig‘ida to‘xtatish tavsiya etildi
Mehnat inspeksiyasi jazirama sharoitida ish beruvchilar uchun majburiy talablarni e’lon qildi.
Mehnat inspeksiyasi jazirama ob-havo sharoitida ish beruvchilar bajarishi shart bo‘lgan talablarni e’lon qildi.
Qayd etilishicha, yuqori harorat sharoitida ochiq havoda mehnat qilayotgan xodimlarda issiq urishi, suvsizlanish, hushdan ketish hamda yurak-qon tomir kasalliklari xavfi ortadi. Shu sababli ish beruvchilar mehnat sharoitlarini jazirama ob-havoga moslashtirishi lozim.
Xususan, soat 11:00 dan 16:00 gacha ochiq havodagi ishlarni qisqartirish yoki zaruratga ko‘ra vaqtincha to‘xtatish, og‘ir jismoniy mehnatni cheklash tavsiya etilgan.
Shuningdek, ish beruvchilar xodimlarni toza ichimlik suvi, soyali yoki sovitiladigan dam olish joylari hamda yengil, havo o‘tkazuvchi va issiqdan himoya qiluvchi maxsus kiyimlar bilan ta’minlashi shart.
Bundan tashqari, issiq sharoitda ishlovchi xodimlar tibbiy ko‘rikdan o‘tgan bo‘lishi, ularga issiq urishi belgilari bo‘yicha tushuntirish ishlari olib borilishi lozim. Xodimning sog‘lig‘i yomonlashgan taqdirda esa u zudlik bilan salqin joyga olib chiqilib, birinchi tibbiy yordam ko‘rsatilishi talab etiladi.
Mehnat inspeksiyasi ushbu talablarga rioya etish tavsiya emas, balki ish beruvchilarning qonuniy majburiyati ekanini alohida ta’kidladi.
Avvalroq anomal issiq fonida O‘zbekistonda elektr energiyasi iste’moli bo‘yicha yangi rekord qayd etilgani xabar qilingan edi.
