Rossiyaga kelgan migrantlarning telefon sotib olishi majburiy qilinishi mumkin

 

Rossiyada mehnat faoliyati yoki uzoq muddatli yashash maqsadida mamlakatga kirayotgan xorijiy fuqarolar, jumladan migrantlar uchun mobil telefon xarid qilish majburiy etib belgilanishi mumkin. Bu haqda Rossiya Ichki ishlar vaziri o‘rinbosari Igor Zubov ma’lum qildi deydi RBK.

 

Uning so‘zlariga ko‘ra, mamlakatga kelgan migrantlar ro‘yxatdan o‘tish jarayonida mobil telefon xarid qiladi va ushbu qurilmaga ularning elektron profili biriktiriladi. Bu orqali huquqni muhofaza qiluvchi organlar migrantlarning joylashuvi va yashash manzilidagi o‘zgarishlarni nazorat qilishi mumkin bo‘ladi.

 

Ta’kidlanishicha, mazkur tizim migrantlarning bir hududdan boshqasiga ko‘chishi yoki yashash joyini o‘zgartirishini nazorat qilish, shuningdek, ularga hujjatlar amal qilish muddati tugashi yoki zarur rasmiy jarayonlar haqida o‘z vaqtida xabarnoma yuborish imkonini beradi.

 

Ma’lumot uchun, 2025-yil 1-sentabrdan Moskva viloyatida "Amina" mobil ilovasi sinov tariqasida joriy etilgan. Ilova geolokatsiya orqali foydalanuvchining joylashuvi haqida Ichki ishlar vazirligiga ma’lumot uzatadi va Rossiyaga vizasiz kirgan voyaga yetgan migrantlar uchun undan foydalanish majburiy hisoblanadi.

 

Rossiya Ichki ishlar vazirligi ma’lumotiga ko‘ra, geolokatsiya ma’lumotlari uch ish kuni davomida tizimga uzatilmagan 139 mingdan ortiq migrant migratsiya hisobidan chiqarilgan.