Eron Quvaytdagi AQSH harbiy obyektlariga zarba berdi
Iroq va Qatar hududlarida ham portlashlar kuzatilgan.
Eron Quvayt hududida joylashgan AQSH harbiy obyektlariga dronlar yordamida zarba berganini ma’lum qildi. Bu haqda Fars axborot agentligi xabar berdi.
Ma’lum qilinishicha, hujumlar Quvaytdagi AQSH harbiy kazarmalari va logistika markazlariga qaratilgan bo‘lib, operatsiyada "Arash" rusumidagi uchuvchisiz uchish apparatlaridan foydalanilgan.
Eron harbiylari bayonotida ushbu zarbalar "Chaqmoq" operatsiyasining 12-bosqichi doirasida amalga oshirilgani qayd etilgan.
Shuningdek, Eron tomoni xuddi shu turdagi dronlar Bahrayndagi Saxir aviabazasi hududida joylashgan AQSH Harbiy-havo kuchlari obyektlariga qarshi ham qo‘llanilganini bildirgan.
Xabarlarga ko‘ra, Iroq va Qatar hududlarida ham portlashlar kuzatilgan.
TASS agentligining yozishicha, Eron ushbu hujumlarni AQSH harbiylarining so‘nggi harakatlariga javob sifatida amalga oshirganini ta’kidlagan.
Shu bilan birga, AQSH Markaziy qo‘mondonligi Eron hududidagi bir qator hududlarda portlashlar sodir bo‘lganini ma’lum qilgan. Xususan, Bandar Abbos, Qeshm oroli, Ahvaz, Bushehr, Bandar Xomeyniy, Bandar Lengeh, Vaysian, Chobahor hamda Eronshahr aeroporti yaqinida hujumlar qayd etilgani bildirilgan.
