"Poytaxt Parking" XDP tanqidiga rasmiy munosabat bildirdi
Kompaniya o‘zini pulli avtoturargohlar operatori ekanini, jarimalar qo‘llamasligi va yig‘ilgan mablag‘lar shahar budjetiga yo‘naltirilishini ma’lum qildi.
"Poytaxt Parking" kompaniyasi O‘zbekiston Xalq demokratik partiyasining pulli avtoturargohlar tizimi yuzasidan bildirgan munosabatiga rasmiy javob e’lon qildi. Unda kompaniya faoliyati atrofida yuzaga kelayotgan ayrim noto‘g‘ri talqinlarga izoh berilgan.
Kompaniya bayonotida ta’kidlanishicha, "Poytaxt Parking" shahar hududlari yoki avtoturargohlarning egasi emas, balki Toshkent shahri bilan tuzilgan shartnoma asosida xizmat ko‘rsatuvchi operator hisoblanadi. Uning vazifasi pulli avtoturargohlarni tashkil etish, ularga texnik xizmat ko‘rsatish, yo‘l belgilari va chiziqlarini o‘rnatish, shuningdek, haydovchilar uchun qulay to‘lov tizimini yaratishdan iborat.
Shuningdek, kompaniya ma’muriy jarimalarni qo‘llash yoki undirish vakolatiga ega emasligini alohida qayd etdi. Bayonotga ko‘ra, ma’muriy javobgarlikni belgilash va qo‘llash faqat vakolatli davlat organlari vakolatiga kiradi. "Poytaxt Parking" jarimalar joriy etilishi tashabbuskori emasligi va bunday qarorlarni qabul qilish jarayonida ishtirok etmasligini bildirdi.
Kompaniya pulli avtoturargohlar uchun undiriladigan to‘lovlarni yig‘ish va ularni shartnomada belgilangan tartibda Toshkent shahri budjetiga o‘tkazishni o‘zining asosiy vazifasi sifatida ko‘rsatdi. Bayonotda ushbu mablag‘lar shahar budjetini to‘ldirish va ijtimoiy loyihalarni moliyalashtirish manbalaridan biri ekani ta’kidlangan.
"Poytaxt Parking" ochiqlik va shaffoflik tamoyillarini qo‘llab-quvvatlashini ham ma’lum qildi. Kompaniya foydalanuvchilar soni, yig‘ilgan to‘lovlar hajmi, mablag‘larning budjetga o‘tkazilishi hamda o‘z majburiyatlari bajarilishi bo‘yicha ma’lumotlarni e’lon qilishga tayyor ekanini bildirdi.
Bayonot yakunida kompaniya o‘zining asosiy maqsadi haydovchilarni jazolash emas, balki shahar markazida tartib va qulaylikni ta’minlash ekanini qayd etdi. Kompaniya fikricha, pulli avtoturargohlar tizimi tartibsiz to‘xtashlar va tirbandliklarni kamaytirishga xizmat qiladi hamda piyodalar va haydovchilar uchun qulay shahar muhitini yaratishga yordam beradi.
"Poytaxt Parking" O‘zbekiston Xalq demokratik partiyasi va jamoatchilik bilan ochiq muloqot qilish, zarur ma’lumotlarni taqdim etish hamda poytaxt aholisi manfaatlari yo‘lida hamkorlik qilishga tayyorligini bildirdi.
