AQShda hibsga olingan o'zbekistonlik yuk mashina haydovchisi garov evaziga ozod qilindi

 

AQShning Ogayo shtatida o‘lim bilan yakunlangan yo‘l-transport hodisasi bo‘yicha ayblanayotgan O‘zbekiston fuqarosi Behzod Asrorov sud qarori bilan garov evaziga hibsdan chiqarildi. Shu bilan birga, u elektron kuzatuv moslamasi taqish sharti bilan rasmiylar nazoratida qoladi.

 

Sud majlisi davomida Asrorov tarjimon yordamida ishtirok etgan. Himoyachi uning AQShdagi transport kompaniyalaridan birida qariyb bir yil davomida haydovchi bo‘lib ishlaganini ma’lum qilgan.

 

Tergov ma’lumotlariga ko‘ra, YTH oqibatida 21 yoshli kollej talabasi va futbolchi Tobias Forsayt halok bo‘lgan. Prokuratura hodisadan so‘ng haydovchi yuk mashinasidagi videokamerani yashirishga uringanini ham da’vo qilmoqda. Shu sabab unga dalillarni yashirish yoki yo‘q qilishga urinish bo‘yicha ham ayblov qo‘yilgan.

 

Huquq-tartibot idoralari hozirda toksikologik ekspertiza natijalari hamda hodisa tafsilotlari bo‘yicha qo‘shimcha tekshiruvlarni kutmoqda. Mazkur jarayon yakuniga ko‘ra, Asrorovga nisbatan qo‘shimcha ayblovlar e’lon qilinishi mumkin.

 

Ma’lum qilinishicha, Behzod Asrorov 2024-yilda "Green Card" dasturi orqali AQShga ko‘chib borgan hamda tijorat yuk mashinalarini boshqarish huquqini beruvchi CDL litsenziyasini olgan. Biroq sud materiallariga ko‘ra, u ingliz tilini bilmagani sababli politsiya xodimlari bilan Google Translate orqali muloqot qilgan.

 

Mazkur hodisadan so‘ng AQShda tijorat haydovchilarini tayyorlash va chet ellik fuqarolarga CDL litsenziyalari berish tartibini kuchaytirish yuzasidan bahs-munozaralar yana avj olgan. AQSh transport vaziri Shon Daffi ingliz tilini yetarli darajada bilmaydigan shaxslarga yuk mashinalarini boshqarishga ruxsat berilmasligi kerakligini ta’kidlagan.