Prezident fuqarolarning ijtimoiy reyestrga kiritish bo‘yicha arizasi asossiz rad etilganini tanqid qildi

Prezident Shavkat Mirziyoyev 16-iyul kuni o‘tkazilgan videoselektor yig‘ilishida joylarda ehtiyojmand oilalarni ijtimoiy reyestrga kiritishni asossiz rad etish va ularni sun’iy ravishda reyestrdan chiqarish holatlari kuzatilayotganini tanqid qildi.

 

Davlat rahbarining ta’kidlashicha, 184 ta mahallada bir oy ichida fuqarolardan kelgan 2 mingta arizaning barchasi asossiz rad etilgan. Oqibatda ehtiyojmand oilalar ijtimoiy yordam, farzandlarini bog‘cha va to‘garaklarga joylashtirish kabi kafolatlangan xizmatlardan foydalana olmagan.

 

Bunday holatlar, ayniqsa, Bo‘ston, Oltinko‘l, Xovos, Toshloq, Sharof Rashidov, Uchquduq va Dehqonobod tumanlarida ko‘p uchrayotgani qayd etildi.

 

Shuningdek, yil boshidan buyon ijtimoiy reyestrga kiritish masalasida Prezident virtual qabulxonasiga kelib tushgan murojaatlar soni 30 mingdan 46 mingtagacha, ya’ni 1,5 barobarga oshgani ma’lum qilindi.

 

Yig‘ilishda Bosh prokuraturaga ijtimoiy reyestrning to‘g‘ri yuritilishi ustidan qat’iy nazorat o‘rnatish, Ijtimoiy himoya milliy agentligi direktorining birinchi o‘rinbosari Shahnoza Mirziyoyevaga esa reyestrning haqqoniyligi yuzasidan prezidentga muntazam axborot berib borish vazifasi yuklatildi.

 

Bundan tashqari, mutasaddilar oldiga yil yakunigacha nogironlikni erta aniqlash, uy-joylarni moslashtirish, ijtimoiy uyga joylashtirish kabi 25 turdagi ijtimoiy xizmatni mahallalar darajasiga tushirish topshirildi.

 

Uch oy ichida demensiya va aqliy zaifligi bo‘lgan shaxslar uchun 250 ta mahallada kunduzgi va uyda parvarish xizmatlari hamda “Madad” uylari, 75 ta mahallada esa o‘zgalar parvarishiga muhtoj keksalar uchun “Faol hayot” dasturi yo‘lga qo‘yilishi rejalashtirilgan. Shuningdek, qarovsiz qolgan va zo‘ravonlikka uchragan bolalar uchun “Qo‘llab-quvvatlash markaz”lari tashkil etiladi.