O‘zbekistonda elektr energiyasi iste’moli rekordi yangilandi
Elektr energiyasi iste’moli va ishlab chiqarish bo‘yicha tarixiy eng yuqori ko‘rsatkich qayd etildi.
O‘zbekiston yagona elektr energetika tizimida 20-iyul kuni elektr energiyasi iste’moli va ishlab chiqarish bo‘yicha tarixdagi eng yuqori ko‘rsatkich qayd etildi.
Energetika vazirligi ma’lumotiga ko‘ra, soat 17:22 holatiga respublika bo‘yicha elektr energiyasi iste’moli 14 GVt, ishlab chiqarish hajmi esa 14,2 GVtni tashkil etgan. Qayd etilishicha, bu mamlakat elektr energetikasi tarixidagi eng yuqori ko‘rsatkich hisoblanadi.
Eslatib o‘tamiz, avvalroq, 17-iyul kuni ham O‘zbekiston yagona energetika tizimida elektr energiyasi iste’moli va ishlab chiqarish bo‘yicha navbatdagi rekord qayd etilgandi. O‘shanda sutkalik elektr energiyasi iste’moli 293,4 million kVt·soatni tashkil etib, o‘tgan yil yozgi mavsumidagi eng yuqori ko‘rsatkichdan 20,8 million kVt·soatga yoki 7,6 foizga yuqori bo‘lgani ma’lum qilingan edi.
Energetika vazirligiga ko‘ra, elektr tarmoqlaridagi yuklama va uskunalarning texnik holati dispetcherlik xizmatlari tomonidan real vaqt rejimida uzluksiz nazorat qilinmoqda. Zarurat tug‘ilganda yuklamani qayta taqsimlash hamda boshqa tezkor choralar ko‘rilib, energotizimning barqaror ishlashi ta’minlanmoqda.
