Pokistonda kuchli yomg‘irlar oqibatida bir kunda 9 kishi halok bo‘ldi
Musson yog‘inlari qurbonlar va vayronagarchiliklarga sabab bo‘ldi.
Pokistonda kuchli yomg‘ir va u bilan bog‘liq tabiiy hodisalar oqibatida so‘nggi 24 soat ichida kamida 9 kishi halok bo‘ldi. Bu haqda mamlakatning Tabiiy ofatlarni boshqarish milliy boshqarmasi ma’lum qildi.
Ma’lumotlarga ko‘ra, qurbonlarning olti nafari Xayber Paxtunxva viloyatida, yana uch nafari esa Azad Jammu va Kashmir hududida qayd etilgan.
Shuningdek, kuchli yog‘ingarchilik va suv toshqinlari oqibatida 28 ta turar joy uyi vayron bo‘lgan.
Pokistonda musson mavsumi iyul oyida boshlanib, odatda sentyabrgacha davom etadi. Ushbu davr qishloq xo‘jaligi uchun muhim bo‘lgan yog‘ingarchiliklarni olib kelsa-da, ko‘pincha suv toshqinlari, ko‘chkilar va boshqa tabiiy ofatlarga ham sabab bo‘ladi.
Mas’ul idoralar aholini ehtiyot choralariga qat’iy rioya qilishga chaqirib, zararlangan hududlarda qutqaruv va tiklash ishlari davom etayotganini bildirdi.
Eslatib o'tamiz, avvalroq Afg‘onistondagi suv toshqinlari oqibatida 20 kishi halok bo‘lgani haqida xabar qilingan edi.
