Maduro va uning rafiqasi ustidan sud 2027-yilda boshlanishi mumkin
Nikolas Maduro va uning rafiqasi AQShda giyohvand moddalar savdosiga aloqadorlikda ayblanmoqda.
Venesuela prezidenti Nikolas Maduro va uning rafiqasi Siliya Floresga nisbatan AQShda ko‘rilayotgan jinoyat ishi bo‘yicha sud jarayoni 2027-yil iyun oyida boshlanishi mumkin.
Bu haqda Nyu-Yorkning Janubiy okrugi federal sudi elektron ma’lumotlar bazasiga joylashtirilgan hujjatda ma’lum qilindi.
Hujjatga ko‘ra, himoya va prokuratura tomonlari sud jarayonini 2027-yil iyun oyida boshlash bo‘yicha yagona jadvalni sudga taqdim etgan.
Taklif etilgan reja asosida prokuratura ish bo‘yicha asosiy maxfiy materiallarni 2026-yil 15-noyabrgacha himoya tomoniga taqdim etadi. Shundan so‘ng tomonlar 2027-yil 11-martgacha zarur iltimosnomalarni kiritish imkoniyatiga ega bo‘ladi.
Mazkur jadvalni tasdiqlash masalasi 22-iyul kuni Nyu-Yorkning Janubiy okrugi federal sudida ko‘rib chiqilishi kutilmoqda.
Eslatib o‘tamiz, 2026-yil yanvar oyida AQSh tomonidan Venesuela prezidenti Nikolas Maduro va uning rafiqasi Siliya Flores qo‘lga olinib, Nyu-Yorkka olib kelingan edi. Ularga nisbatan giyohvand moddalar savdosiga aloqadorlik ayblovi qo‘yilgan. Ikkalasi ham o‘ziga qo‘yilgan ayblovlarni rad etgan.
