Anomal issiq sabab yopilgan bog‘cha xodimlariga ish haqi to‘liq to‘lanadi
Bog‘chaga bormagan kunlar uchun ota-onalardan to‘lov undirilmaydi, oldindan to‘langan mablag‘ esa keyingi oy hisobiga o‘tkaziladi.
O‘zbekistonda anomal issiq sabab vaqtincha yopilgan davlat maktabgacha ta’lim tashkilotlari xodimlariga ish haqi to‘liq to‘lanadi. Bu haqda Maktabgacha va maktab ta’limi vazirligining hududiy boshqarmalarga yuborgan ko‘rsatmasiga tayanib xabar qilindi.
Ko‘rsatmaga ko‘ra, Qoraqalpog‘iston Respublikasi Maktabgacha va maktab ta’limi vazirligi, Toshkent shahar hamda barcha viloyatlar maktabgacha va maktab ta’limi boshqarmalariga anomal issiq ob-havo tufayli bekor turib qolingan davr uchun xodimlarga ish haqi to‘liq to‘lanishini ta’minlash topshirilgan.
Shuningdek, bog‘chaga kelmagan kunlar uchun ota-onalardan to‘lov undirilmaydi. Agar ota-ona to‘lovi oldindan amalga oshirilgan bo‘lsa, bola qatnashmagan kunlar uchun to‘langan mablag‘ keyingi oy to‘lovidan chegirib qolinadi.
Vazirlik qayd etishicha, ota-onalar to‘lovlari hamda qonunchilikda belgilangan boshqa hisob-kitoblarni amalga oshirishda bolalarning elektron davomat ma’lumotlari yagona asos hisoblanadi.
Eslatib o‘tamiz, anomal issiq tufayli iyul oyida Qoraqalpog‘iston, Xorazm, Navoiy, Buxoro, Farg‘ona va Toshkent viloyatlaridagi qator davlat maktabgacha ta’lim tashkilotlari bir necha kun muddatga faoliyatini to‘xtatgan edi.
