Тошкент вилоятидаги барча боғчалар аномал иссиқ сабаб вақтинча ёпилди
Давлат ва нодавлат мактабгача таълим ташкилотлари фаолияти 16 июлдан вақтинча тўхтатилди.
Тошкент вилоятида кузатилаётган аномал иссиқ об-ҳаво сабаб барча давлат, нодавлат ва идоравий мактабгача таълим ташкилотлари фаолияти вақтинча тўхтатилди.
Маълум қилинишича, вилоят ҳокими Зоир Мирзаев раислигида ўтказилган йиғилишда туман ва шаҳар ҳокимликларига 16 июлдан бошлаб барча давлат, хусусий ҳамда идоравий боғчалар фаолиятини вақтинча тўхтатиш бўйича топшириқ берилган.
Қайд этилишича, мактабгача таълим ташкилотлари фаолияти об-ҳаво меъёрий ҳолатга келгач, Тошкент вилояти ҳокимлигининг қўшимча қарори асосида қайта тикланади.
Эслатиб ўтамиз, аномал иссиқ сабаб аввалроқ Қорақалпоғистон Республикасидаги айрим боғчалар 17–18 июлгача, Хоразм вилоятидаги барча давлат боғчалари 14–17 июль кунлари вақтинча ёпилганди. Шунингдек, Навоий вилоятида айрим давлат боғчалари фаолияти тўрт кунга тўхтатилган, Бухоро вилоятидаги барча боғчалар 15 июлдан ёпилган, Фарғона вилоятидаги давлат ва нодавлат мактабгача таълим ташкилотлари эса 16–17 июль кунлари ишламаслиги маълум қилинганди.
