Qirg‘iziston Wildberries omborlariga hujumlardan so‘ng o‘z fuqarolariga ogohlantirish berdi
Hujumlarda zarar ko‘rgan omborlardagi qirg‘iz tadbirkorlariga tegishli mahsulotlar inventarizatsiya qilinmoqda.
Qirg‘iziston Tashqi ishlar vazirligi Rossiyadagi fuqarolarini Wildberries omborlariga uyushtirilgan dron hujumlaridan so‘ng ehtiyotkor bo‘lishga chaqirdi.
Vazirlik ma’lumotiga ko‘ra, 22-iyul oqshomida Rossiyaning bir qator hududlaridagi Wildberries omborlariga uyushtirilgan hujumlarda Qirg‘iziston fuqarolari jabrlanmagan. Shunga qaramay, ehtimoliy yangi hujumlar xavfi sabab vatandoshlarga xavfsizlik choralariga qat’iy rioya qilish tavsiya etildi.
Shuningdek, Rossiyada yashayotgan Qirg‘iziston fuqarolariga rasmiy idoralar tomonidan berilayotgan ogohlantirish va tavsiyalarga amal qilish so‘ralgan. Qirg‘izistonning Rossiyadagi elchixonasi vaziyatni doimiy nazorat qilayotgani hamda jabrlanganlar bo‘yicha ma’lumotlarni aniqlashtirishda davom etayotgani bildirgan.
Ma’lumot uchun, Ukraina Qurolli Kuchlari 18-iyul kuni Moskva va Tambov viloyatlaridagi, 22-iyul kuni esa Krasnodar va Stavropol o‘lkalaridagi Wildberries omborlariga dron hujumlari uyushtirgan. Ushbu hujumlar oqibatida kamida 8 kishi halok bo‘lgan, 50 nafardan ortiq inson jarohat olgan.
Qirg‘iziston Iqtisodiyot va savdo vazirligi esa hujumga uchragan omborlarda saqlanayotgan qirg‘iz tadbirkorlariga tegishli mahsulotlarga yetkazilgan zarar yuzasidan inventarizatsiya jarayonini kuzatib bormoqda.
