Украина Россиядаги Wildberries омборларига зарба берди, саккиз киши ҳалок бўлди

Россиянинг Тамбов шаҳри ва Москва вилоятидаги Электростал шаҳрида жойлашган Wildberries компаниясига қарашли иккита логистика омбори Украина дронлари ҳужумига учради. Россия расмийлари маълумотига кўра, ҳодиса оқибатида саккиз киши ҳалок бўлган, 62 киши тан жароҳати олган. Бу ҳақда BBC хабар берди.

 

Маълум қилинишича, Тамбовдаги омборга уюштирилган ҳужумда етти киши ҳалок бўлган ва 25 киши жароҳатланган. Электросталдаги омборга берилган зарбада эса бир киши вафот этиб, 37 киши жароҳат олган.

 

Украина Президенти Володимир Зеленский зарбалар "дронлар ишлаб чиқариш ва навигация ускуналари учун санкциялар остидаги бутловчи қисмлар етказиб беришда фойдаланилган йирик логистика объектлари"га қаратилганини маълум қилди. Унинг айтишича, Украина Азов денгизи, Қора денгиз ва Россия аннексия қилган Қримдаги нишонларга ҳам зарба берган.

 

Wildberries бош директори Татяна Ким воқеани компания учун "даҳшатли тун" деб атади. Тамбов вилояти губернатори Евгений Первишовнинг маълум қилишича, тунги сменада ишлаётган етти ходим воқеа жойида ҳалок бўлган. Унга кўра, ҳужум вақтида ҳудудга яқинлашаётган 28 та дрон уриб туширилган.

 

Москва вилояти губернатори Андрей Воробёв эса Электросталдаги ҳужумда жароҳатланганларнинг саккиз нафари оғир аҳволда эканини билдирди. Шунингдек, унинг сўзларига кўра, тунда Москва вилоятида жами 48 та дрон уриб туширилган, улардан бири нефть базасига қулаб, ёнғин келтириб чиқарган.

 

Украина Хавфсизлик ва ҳамкорлик маркази раиси Сергей Кузан BBC'га Wildberries Россия логистика тизимининг муҳим бўғини эканини, компания платформаси орқали ҳарбий эҳтиёжлар учун икки мақсадда фойдаланиладиган маҳсулотлар ва электрон жиҳозлар харид қилинганини айтди. Унинг таъкидлашича, ҳужумдан асосий мақсад Россия армияси ва мудофаа саноати таъминот занжирини издан чиқариш бўлган.

 

Зеленский Украина ҳужумлари Россиянинг Украина ҳудудларидаги фуқаролик инфратузилмасига бераётган зарбаларига жавоб эканини таъкидлади. Шу билан бирга, Россия ҳужумлари оқибатида Украинада чоршанбага ўтар кечаси 14 киши ҳалок бўлгани маълум қилинди.