Rossiya cheklov qo‘ygan O‘zbekistonning 5 ta eksportchi korxonasi tekshiruvdan o‘tkazilmoqda

 

Rossiya tomonidan vaqtinchalik cheklov joriy etilgan O‘zbekistonning beshta eksportchi korxonasi faoliyati yuzasidan tekshiruv boshlandi.

 

Oziq-ovqat mahsulotlari xavfsizligi qo‘mitasi ma’lum qilishicha, Rossiya Federatsiyasining Veterinariya va fitosanitariya nazorati bo‘yicha federal xizmati (Rosselxoznadzor) fitosanitariya talablarini muntazam buzgan beshta eksportchi korxonaga nisbatan 2026-yil 23-iyuldan boshlab karantin ostidagi mahsulotlarni Rossiya hududiga olib kirishga vaqtinchalik cheklov joriy etgan.

 

Rossiya tomoni taqdim etgan rasmiy ma’lumotlarga ko‘ra, fitosanitariya talablarini buzish holatlari:

• Xorazm viloyati Yangibozor tumanidagi 1 ta korxonada — 15 ta;

• Surxondaryo viloyati Uzun tumanidagi 1 ta korxonada — 11 ta;

• Navoiy viloyati Qiziltepa tumanidagi 2 ta korxonada — 15 ta;

• Buxoro viloyati G‘ijduvon tumanidagi 1 ta korxonada — 7 ta holatda aniqlangan.

 

Qo‘mita tomonidan har bir korxona kesimida mahsulotni yetishtirish, saqlash, saralash va eksportga tayyorlash jarayonlari, fitosanitariya nazorati hamda mahsulot kuzatuvchanligi (traceability) tizimi o‘rganilmoqda.

 

Shuningdek, milliy qonunchilik va xalqaro fitosanitariya talablari asosida zarur huquqiy hamda tashkiliy choralar ko‘rilishi, Rosselxoznadzor bilan hamkorlikda aniqlangan kamchiliklarni bartaraf etish va cheklovlarni qisqa muddatda bekor qilish bo‘yicha ishlar davom ettirilishi ma’lum qilindi.

 

Qo‘mita mazkur cheklovlar faqat fitosanitariya talablari buzilgani qayd etilgan ushbu beshta korxonaga nisbatan qo‘llanayotganini, qolgan mahalliy eksportchilar faoliyati esa odatdagi tartibda davom etayotganini ta’kidladi.