Shavkat Mirziyoyev tavallud kuni munosabati bilan yo‘llangan tabriklar uchun minnatdorlik bildirdi
Prezident Shavkat Mirziyoyev tavallud kuni munosabati bilan yo‘llangan tabriklarni Yangi O‘zbekistonning xalqaro nufuzi va xalqqa bildirilgan hurmat ifodasi deb baholadi.
O‘zbekiston Prezidenti Shavkat Mirziyoyev tavallud kuni munosabati bilan yo‘llangan tabrik va ezgu tilaklar uchun minnatdorlik bildirdi.
Davlat rahbari o‘z murojaatida uni tabriklagan davlat va hukumat boshliqlari, xorijiy siyosat va jamoat arboblari, ishbilarmon doiralar vakillari, xalqaro tashkilotlar rahbarlari, shuningdek, mamlakatdagi mahallalar va mehnat jamoalari, nuroniylar, yoshlar, xotin-qizlar, tadbirkorlar hamda barcha vatandoshlarga samimiy tashakkur izhor etdi.
Prezidentning ta’kidlashicha, uning sha’niga yo‘llangan tabrik va tilaklar, avvalo, O‘zbekiston xalqi va davlatiga bildirilgan yuksak hurmat va ehtirom, shuningdek, Yangi O‘zbekistonning xalqaro maydondagi obro‘-e’tibori va nufuzi ortib borayotganining e’tirofi hisoblanadi.
Shavkat Mirziyoyev, shuningdek, bag‘rikeng va oliyjanob O‘zbekiston xalqiga cheksiz mehr va hurmatini yana bir bor bildirib, mamlakatda erkin, farovon va obod hayot barpo etishga qaratilgan islohotlar xalqning aql-zakovati hamda fidokorona mehnati bilan o‘z samarasini berishiga ishonch bildirdi.
