Venesueladagi zilzila zarari 20 milliard dollarga yaqinlashdi

 

Jahon banki Venesuelada 24-iyun kuni sodir bo‘lgan kuchli zilzilalar oqibatida yetkazilgan moddiy zarar qariyb 19,6 milliard dollarga yetganini ma’lum qildi.

 

Mazkur ma’lumot Jahon bankining Global Rapid Damage Estimation (GRADE) dastlabki baholash hisobotida keltirilgan. Hisobot Venesuela hukumati va xalqaro hamkorlarga tiklanish ishlari ko‘lamini aniqlash hamda ustuvor yo‘nalishlarni belgilash uchun tayyorlangan.

 

Hisob-kitoblarga ko‘ra, umumiy zararning 47 foizi turar-joy binolari, 27 foizi infratuzilma, 26 foizi esa turar joy bo‘lmagan obyektlar, jumladan tijorat va sanoat inshootlariga to‘g‘ri kelgan. Eng katta talafot La Guayra shtati va Poytaxt okrugi hududlarida qayd etilgan.

 

Jahon banki mutaxassislari tiklanish sur’ati mamlakatning iqtisodiy va ijtimoiy tiklanishida hal qiluvchi omil bo‘lishini ta’kidlagan. Hisobotga ko‘ra, qo‘shimcha investitsiyalar jalb etilmasa, infratuzilmani to‘liq tiklash 10 yildan ortiq vaqt olishi va iqtisodiy faollikka uzoq muddatli salbiy ta’sir ko‘rsatishi mumkin.

 

Eslatib o'tamiz, 24-iyun kuni Venesuela shimolida sodir bo‘lgan 7,2 va 7,5 magnitudali ikki zilzila sodir bo'lgan edi. Tabiiy ofat oqibatida minglab binolar zarar ko‘rgan, 5 398 kishi halok bo‘lgan, o‘n minglab aholi esa vaqtinchalik boshpanalarga joylashtirilgan. Jahon banki tezkor va barqaror tiklanish choralarini amalga oshirish iqtisodiy yo‘qotishlarni sezilarli darajada kamaytirishga xizmat qilishini qayd etdi.