Венесуэлада кучли зилзила содир бўлди: минглаб қурбонлар бўлиши айтилмоқда

Кеча, 24 июнь куни Венесуэлада 7,2 ва 7,5 балли кетма-кет иккита кучли зилзила юз берди.

Маълумотларга кўра, аввал 7,2 магнитудали ер силкиниши қайд этилган бўлса, орадан атиги 39 сония ўтиб ундан ҳам кучлироқ — 7,5 магнитудали зилзила юз берган.

Кучли силкинишлар пойтахт Каракас ва мамлакатнинг бошқа йирик шаҳарларида кенг кўламли вайронагарчиликларни келтириб чиқарди. Кўплаб турар жойлар ва маъмурий бинолар қулаган, одамлар эса вайроналар остида қолиб кетган.

 

Қурбонлар сони 10 мингдан 100 минггача етиши мумкинлиги тахмин қилинмоқда. Венесуэла расмийлари ҳозирча ҳалок бўлганлар ва жабрланганлар сонини расман маълум қилмаган.

 

Венесуэла президенти вазифасини бажарувчи Делси Родригес мамлакатда фавқулодда ҳолат эълон қилди. У зилзила туфайли Каракас халқаро аэропорти ёпилгани, метро ва темир йўл қатнови ҳам тўхтатилганини айтди. Шунингдек, аҳолини хотиржамликни сақлашга ва шикастланган биноларни тарк этишга чақирган.

 

Мутахассислар ушбу зилзилани Венесуэлада сўнгги бир асрдан ортиқ вақт ичида кузатилган энг кучли ер силкинишларидан бири сифатида баҳоламоқда. Каракас аҳолисининг кўпчилиги 1967 йилда содир бўлган аввалги вайронкор зилзилани ёдга олган. Ўшанда ҳам пойтахтда энг кўп зарар қайд этилган. Шаҳарнинг Палос Гранде ва Альтамира туманларида турар жой бинолари қулаб тушган, жами 200 дан ортиқ одам ҳалок бўлган.

 

Венесуладан сўнг Япония шимоли-шарқида ҳам 7,2 магнитудали зилзила содир бўлди. Аввалига зилзила магнитудаси 6,9 деб баҳоланган, аммо кейинчалик бу маълумот қайта кўриб чиқилиб, 7,2 магнитуда экани аниқланган.

Зилзила Иватэ префектурасининг Тинч океани соҳиллари яқинида, 44 километр чуқурликда кузатилган. Ерости силкинишлари энг кучли даражада Аомори префектурасининг Хасиками шаҳрида сезилган. Шунингдек, у пойтахт Токио шаҳрида ҳам билинган.

Хасиками ва Хатинохе шаҳарлари ёнғин-қутқарув хизматлари маълумотига кўра, тўрт нафар фуқаро енгил жароҳатлар билан шифохонага ётқизилган.