Surxondaryoda voyaga yetmagan qizni zo'rlagan sobiq IIB xodimi 15 yilga qamaldi
Shuningdek, unga ikki yil davomida ichki ishlar organlarida ishlash taqiqi qo‘yildi.
Surxondaryo viloyatida qizni zo‘rlashda ayblangan sobiq voyaga yetmaganlar ishlari bo‘yicha inspektor-psixologga nisbatan sud hukmi e’lon qilindi.
Avvalroq Denov tumani Ichki ishlar bo‘limi Jinoyatchilikning oldini olish bo‘limining sobiq voyaga yetmaganlar ishlari bo‘yicha inspektor-psixologi A.R.ga nisbatan jinoyat ishi qo‘zg‘atilgani haqida xabar berilgandi.
22-iyul kuni Denov tumani Jinoyat ishlari bo‘yicha sudi mazkur ish yuzasidan hukm chiqardi.
Sud qaroriga ko‘ra, A.R. Jinoyat kodeksining 118-moddasi 4-qismi (o‘n to‘rt yoshga to‘lmagan shaxsni zo‘rlash) hamda 206-moddasi 1-qismi (hokimiyat yoki mansab vakolatini suiiste’mol qilish) bilan aybdor deb topildi.
Unga 15 yil 1 oy muddatga ozodlikdan mahrum qilish jazosi tayinlandi. Shuningdek, mahkumning ikki yil davomida ichki ishlar organlarida ishlashi taqiqlandi.
Sud hukmiga ko‘ra, A.R. tayinlangan jazoni umumiy tartibli koloniyada o‘taydi.
