Denovda sobiq IIB xodimi 14 yoshga to'lmagan qizning nomusiga tegishda gumonlanmoqda
Ish yuzasidan dastlabki tergov yakunlanib, ayblov xulosasi bilan jinoyat ishi sudga yuborilgan.
Surxondaryo viloyatining Denov tumanida ichki ishlar organlarining sobiq xodimi voyaga yetmagan qizning nomusiga tegishda gumon qilinmoqda. Bu haqda viloyat prokuraturasi ma’lum qildi.
Qayd etilishicha, Denov tumani IIB Jamoat xavfsizligi xizmati huquqbuzarliklar profilaktikasi bo‘limining voyaga yetmaganlar masalalari bo‘yicha sobiq inspektor-psixologi A.R.ga nisbatan Jinoyat kodeksining 118-moddasi 4-qismi (14 yoshga to‘lmagan shaxsning nomusiga tegish), 129-moddasi 3-qismi (zo‘rlik ishlatib yoki qo‘rqitib 16 yoshga to‘lmagan shaxsga nisbatan uyatsiz-buzuq harakatlar qilish) hamda 206-moddasi 1-qismi (hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilgan.
Tergov organlari ma’lumotiga ko‘ra, ish yuzasidan dastlabki tergov yakunlanib, ayblov xulosasi bilan jinoyat ishi sudga yuborilgan.
Eslatib o‘tamiz, avvalroq Andijon viloyatida ham voyaga yetmagan shaxsga nisbatan jinsiy jinoyat sodir etganlikda gumon qilingan ichki ishlar xodimi hibsga olingani haqida xabar berilgan edi.
