Prezident Shavkat Mirziyoyev temir yo‘l transporti sohasi xodimlarini kasb bayrami bilan tabrikladi
Prezident Shavkat Mirziyoyev O‘zbekiston temir yo‘l tizimini yanada modernizatsiya qilish bo‘yicha rejalarni ma’lum qildi.
Prezident Shavkat Mirziyoyev Temir yo‘l transporti xodimlari kuni munosabati bilan yo‘llagan tabrigida O‘zbekiston temir yo‘l tizimini modernizatsiya qilish ishlari davom etishini bildirib, yaqin yillarda yuzlab zamonaviy yo‘lovchi vagonlari va yuqori texnologik poyezdlar xarid qilinishini ma’lum qildi.
Prezidentning ta’kidlashicha, so‘nggi yillarda temir yo‘l transporti sohasida amalga oshirilgan islohotlar natijasida 2 ming 400 kilometrdan ortiq yangi temir yo‘l tarmoqlari qurilib foydalanishga topshirildi, 3 ming kilometrdan ziyod yo‘llar elektrlashtirildi hamda 1 ming 100 kilometrdan ortig‘i reabilitatsiya qilindi.
Davlat rahbari Samarqand–Urgut, Baytqo‘rg‘on–Parkent va Urganch xalqaro aeroporti–Xiva temir yo‘l tarmoqlari barpo etilgani, Navoiy–Buxoro uchastkasining ikkinchi elektrlashtirilgan liniyasi ishga tushirilganini qayd etdi. Shuningdek, Maroqand–Navoiy, Buxoro–Urganch–Xiva, Miskin–Nukus va Qumqo‘rg‘on–Quduqli yo‘nalishlarini elektrlashtirish ishlari davom etayotgani bildirildi.
Shavkat Mirziyoyev mamlakatni xalqaro transport yo‘laklari bilan bog‘laydigan Xitoy–Qirg‘iziston–O‘zbekiston temir yo‘li qurilishi hamda Afg‘oniston bilan temir yo‘l infratuzilmasini rivojlantirish bo‘yicha hamkorlik O‘zbekistonning mintaqaviy transport va tranzit markazi sifatidagi mavqeini mustahkamlayotganini ta’kidladi.
Prezident, shuningdek, Janubiy Koreyaning Hyundai Rotem kompaniyasi tomonidan ishlab chiqarilgan yangi yuqori tezlikdagi "Jaloliddin Manguberdi" elektropoyezdi Toshkent–Xiva–Toshkent yo‘nalishida qatnovni boshlaganini eslatdi.
Davlat rahbari yaqin yillarda yuzlab zamonaviy yo‘lovchi vagonlari va yuqori texnologik poyezdlar xarid qilinishi, temir yo‘l infratuzilmasi kengaytirilishi, vokzallar modernizatsiya qilinishi hamda sohada raqamli texnologiyalar va sun’iy intellekt imkoniyatlari keng joriy etilishini ma’lum qildi.
So‘zining yakunida Prezident temir yo‘l transporti sohasi xodimlarini kasb bayrami bilan tabriklab, ularga sihat-salomatlik, oilaviy baxt va mehnat faoliyatida muvaffaqiyatlar tiladi.
