Eron AQSH bilan muzokaralar o‘tkazilayotganini rad etdi
Tehron hozircha Vashington bilan hech qanday muzokara olib bormayotganini, Ummon bilan muloqotlar esa faqat Hormuz bo‘g‘ozidagi kemalar qatnoviga oid masalalar bilan cheklanganini ma'lum qildi.
Eron Tashqi ishlar vazirligi AQSH bilan yangi muzokaralar boshlanganiga oid bayonotlarni rad etdi. Vazirlik matbuot kotibi Ismoil Baqoiyning aytishicha, Tehron va Vashington o‘rtasida hech qanday siyosiy muzokaralar olib borilmayapti va bunday uchrashuvlar kun tartibida ham yo‘q. Bu haqda Reuters xabar berdi.
Baqoiyga ko‘ra, ayni paytda Ummon bilan olib borilayotgan muloqotlar faqat Hormuz bo‘g‘ozida kemalar harakati xavfsizligini vaqtincha ta'minlash masalasiga bag‘ishlangan. Uning ta'kidlashicha, bu jarayonni AQSH bilan keng qamrovli siyosiy muzokaralar sifatida talqin qilish noto‘g‘ri.
"AQSH bilan hech qanday muzokaralar olib borilmayapti. Ummon bilan muloqotlar faqat Hormuz bo‘g‘oziga oid texnik masalalarni qamrab oladi", degan Ismoil Baqoiy.
Eron tomoni, shuningdek, tashqi ishlar vaziri Abbos Aroqchi mamlakat tashqarisida diniy safarda ekanini, Eron delegatsiyasining esa xorijga jo‘nab ketmagani va yaqin kunlarda AQSH vakillari bilan uchrashuv rejalashtirilmaganini bildirdi.
Avvalroq AQSH prezidenti Donald Tramp Eron bilan muzokaralar 3-avgust kuni boshlanishini va harbiy zarbalarni vaqtincha to‘xtatishga qaror qilganini ma'lum qilgan edi. Biroq Tehron bu bayonotlarni inkor etib, mavjud diplomatik aloqalar faqat Ummon vositachiligida Hormuz bo‘g‘ozidagi dengiz qatnovini tartibga solish masalalari bilan cheklanayotganini ta'kidladi.
