Bugun AQSH va Eron o‘rtasidagi muzokaralar boshlanadi — Tramp
Eron esa hozircha bu borada rasmiy bayonot bergani yo‘q.
AQSH prezidenti Donald Tramp AQSH va Eron o‘rtasidagi yangi muzokaralar bugun boshlanishini ma’lum qildi. Uning aytishicha, muzokaralar Eronga rejalashtirilgan keng ko‘lamli zarbalar bekor qilinganidan so‘ng yo‘lga qo‘yilmoqda.
Tramp Air Force One bortida jurnalistlar bilan suhbatda Eron hujum xavfi yaqinlashayotganini anglaganini ta’kidlagan. Shuningdek, u muzokaralar dushanba tushdan keyin boshlanishini bildirgan.
AQSH prezidenti avvalroq Truth Social ijtimoiy tarmog‘ida Eron hamda AQSHning Yaqin Sharqdagi ittifoqchilari undan harbiy hujumlardan tiyilishni so‘ragani va tomonlar o‘rtasidagi kelishuvning asosiy shartlari bo‘yicha muhim siljishlarga erishilganini yozgan edi.
Biroq Eron tomoni hozircha muzokaralar sanasi yoki ularda ishtirok etishga tayyorligi yuzasidan rasmiy bayonot bermagan.
Tramp muzokaralar uchun aniq muddat belgilashdan bosh tortib, vaziyat rivojiga qarab qaror qabul qilinishini aytgan. U, shuningdek, Saudiya Arabistoni valiahd shahzodasi Muhammad bin Salmon hamda AQSHning mintaqadagi hamkorlari — BAA va Qatar rahbariyati uni dam olish kunlari Eronga qarshi yangi hujumlardan voz kechishga chaqirganini ma’lum qilgan.
AQSH prezidenti, shuningdek, Hormuz bo‘g‘ozi va Eron yadro dasturi bo‘yicha kelishuvlarga erishish imkoniyati mavjudligini bildirib, tomonlar muzokaralar orqali muammolarni hal qilishga tayyor ekanini qayd etgan.
