Toshkentdagi Islom Karimov yodgorlik majmuasi atrofi aholi uchun ochilmoqda
Islom Karimov nomidagi ilmiy-ma’rifiy yodgorlik majmuasiga tutash 37 gektar hududni kompleks rivojlantirish ishlari boshlandi. Avvalroq Saida Mirziyoyeva poytaxtdagi istirohat bog‘larini ko‘zdan kechirgandi.
Iyul oyida Prezident Administratsiyasi rahbari Saida Mirziyoyeva poytaxtdagi istirohat bog‘larini ko‘zdan kechirgan edi. O‘shanda shahardagi bog‘lar holati o‘rganilib, ularda aholi muntazam dam olishi uchun barcha zarur sharoitlarni yaratish rejalashtirilayotgani ma’lum qilingandi.
Bugun Toshkent shahridagi O‘zbekiston Respublikasining Birinchi Prezidenti Islom Karimov nomidagi ilmiy-ma’rifiy yodgorlik majmuasiga tutash 37 gektar maydondagi park hududini kompleks rivojlantirish va uni aholi uchun qulay ochiq jamoat makoniga aylantirish bo‘yicha keng ko‘lamli ishlar boshlandi.
Ma’lum qilinishicha, loyiha doirasida park hududini zamonaviy shaharsozlik talablari va aholi ehtiyojlariga moslashtirish maqsadida ochiqlik va qulaylikni ta’minlash, ekologik holatni yaxshilash, yashil hududlarni kengaytirish hamda zamonaviy infratuzilmani rivojlantirish ishlari amalga oshiriladi.
Qayd etilishicha, mazkur tashabbuslar poytaxtdagi ekologik vaziyatni yaxshilash, aholi uchun qulay sharoit yaratish hamda markaziy ko‘chalar va ularga tutash hududlarda yashil maydonlar va bog‘larni kengaytirishga qaratilgan keng ko‘lamli ishlarning bir qismi hisoblanadi.
