“Toshkentga 'yashil shahar' maqomi qaytariladi” — Saida Mirziyoyeva
Saida Mirziyoyeva Toshkentdagi qator bog‘ va jamoat maskanlarini ko‘zdan kechirdi.
Prezidenti administratsiyasi rahbari Saida Mirziyoyeva Toshkent shahridagi qator muhim obyektlarni ko‘zdan kechirib, poytaxtni yanada ko‘kalamzorlashtirish va yashil hududlarni kengaytirish bo‘yicha rejalarni ma’lum qildi.
Uning ta’kidlashicha, Toshkent jadal rivojlanayotgan bo‘lsa-da, shaharda yashil hududlar yetarli emas. Shu bois yangi istirohat bog‘larini barpo etish va atrof-muhitni ko‘kalamzorlashtirish poytaxt kelajagi uchun ustuvor yo‘nalishlardan biri hisoblanadi.
Qayd etilishicha, Afrosiyob ko‘chasidagi bog‘da aholi erkin dam olishi uchun zarur sharoitlar yaratiladi. Shuningdek, Sayilgoh ko‘chasi, Amir Temur shohko‘chasi va unga tutash hududlarni yangilash, Bobur nomidagi Ekopark hamda Mirzo Ulug‘bek nomidagi bog‘ maydonlarini kengaytirish masalalari ham muhokama qilingan.
Saida Mirziyoyeva asosiy maqsad Toshkentga "yashil shahar" maqomini qaytarish, fuqarolar uchun mazmunli hordiq chiqarish va sayr qilish imkonini beruvchi ochiq maydonlarni ko‘paytirish ekanini ta’kidladi.
Shuningdek, u qulay va xavfsiz shahar muhitini rivojlantirish, ko‘kalamzorlashtirish ishlarini izchil davom ettirish hamda mavjud infratuzilmadan samarali foydalanish zarurligini qayd etdi.
“Shahar aholisining turmush darajasini yaxshilash yo‘lida bu masalalarni hal etishga zudlik bilan kirishmoq juda muhim”, deya yozdi Mirziyoyeva.
