Prezident “Yangi O‘zbekiston bunyodkorlari” tanlovi g‘oliblarini tabrikladi
Tanlovning uch bosqichida 124 mingdan ziyod yosh ishtirok etib, yakunda 10 ta kasb yo‘nalishi bo‘yicha 120 nafar g‘olib va sovrindor aniqlandi.
Prezident Shavkat Mirziyoyev “Yangi O‘zbekiston bunyodkorlari” kasbiy mahorat milliy tanlovi g‘olib va sovrindorlarini tabrikladi.
Davlat rahbari murojaatida zamonaviy iqtisodiyot, raqamli texnologiyalar va yangi korxonalar o‘z kasbining ustasi bo‘lgan, raqobatbardosh mutaxassislarni tayyorlash va rag‘batlantirishni talab etayotganini ta’kidladi.
Ilk bor Prezident sovrini uchun tashkil etilgan tanlov uch bosqichda o‘tkazilgan. Uning dastlabki — tuman va shahar bosqichida 124 ming nafardan ziyod yosh ishtirok etgan. Hududiy bosqichda esa qariyb 7 ming nafar ishtirokchi qatnashgan bo‘lib, ularning 3,5 ming nafari o‘zini o‘zi band qilgan mahalla yoshlari bo‘lgan.
Tanlov jarayonida 22 ming nafar yosh uchun ishlash, ta’lim olish yoki mehnat bozorida o‘z o‘rnini topish imkoniyati yaratilgan.
Shuningdek, qariyb 8,9 ming nafar ishtirokchiga ishga joylashish uchun yo‘llanmalar berilgan, 4 470 nafar yosh texnikumlarda o‘qish uchun tavsiya etilgan. Chet elda ishlashni rejalashtirgan 8 340 nafarga yaqin yosh xorijiy ish beruvchilar tanlovlariga yo‘naltirilgan. Tanlov yakunida 10 ta kasb yo‘nalishida 120 nafar ishtirokchi g‘olib va sovrindor deb topilgan.
Shavkat Mirziyoyev g‘oliblar va yuqori natija ko‘rsatgan ishtirokchilar orasidan O‘zbekiston terma jamoasini shakllantirib, ularni WorldSkills International xalqaro tanloviga tayyorlash zarurligini ta’kidladi.
Buning uchun eng kuchli mahalliy va xorijiy mutaxassislarni jalb etish, jamoani zamonaviy uskunalar va o‘quv-mashq bazasi bilan ta’minlash rejalashtirilgan.
Prezident yoshlarni yangi bilim va texnologiyalarni egallash, xorijiy tillarni o‘rganish hamda o‘z kasbi bo‘yicha ilg‘or mutaxassis bo‘lishga chaqirdi.
