Tataristonda halok bo‘lgan o‘zbekistonliklarning oilalariga 2 mln rubldan beriladi
Jarohatlanganlarga esa jarohat darajasiga qarab 300 mingdan 600 ming rublgacha kompensatsiya to‘lanadi.
Tataristonning Nijnekamsk shahrida 10-avgust kuni sodir bo‘lgan dron hujumi oqibatida halok bo‘lganlarning oilalariga 2 million rubldan bir martalik moddiy yordam ko‘rsatiladi. Bu haqda Tatariston hukumati matbuot xizmati ma’lum qildi.
Tatariston Raisi Rustam Minnixanov qaroriga ko‘ra, hujum oqibatida halok bo‘lgan har bir fuqaroning oilasiga 2 million rubl miqdorida kompensatsiya to‘lanadi.
Shuningdek, jabrlanganlarga tan jarohatlarining og‘irlik darajasiga qarab moddiy yordam ajratiladi. Og‘ir va o‘rtacha og‘ir jarohat olganlarga 600 ming rubl, yengil jarohat olganlarga esa 300 ming rubl to‘lanadi.
Bundan tashqari, hujum oqibatida mol-mulki zarar ko‘rgan fuqarolarga ham kompensatsiya berilishi belgilangan. Muhim mol-mulk to‘liq yo‘qotilgan taqdirda 156 ming rubldan ortiq, qisman yo‘qotilgan holatlarda esa 78,3 ming rubl miqdorida moddiy yordam ko‘rsatiladi.
Mablag‘lar Tatariston Vazirlar Mahkamasining zaxira jamg‘armasi hisobidan ajratiladi.
Eslatib o‘tamiz, 10-avgust kuni Nijnekamskdagi sanoat va fuqarolik obyektlariga dron hujumi uyushtirilgan. Hodisa oqibatida 13 kishi, jumladan, bir bola halok bo‘lgan, 70 dan ortiq kishi tibbiy yordamga murojaat qilgan, 21 kishi shifoxonaga yotqizilgan. Halok bo‘lganlar orasida O‘zbekiston va Tojikiston fuqarolari ham borligi xabar qilingan edi.
