Tataristonda halok bo‘lgan o‘zbekistonliklarning jasadlari Vatanga olib kelindi
Dronlar hujumi oqibatida 8 nafar O‘zbekiston fuqarosi halok bo‘lgan edi.
Rossiyaning Tatariston Respublikasi Nijnekamsk shahrida 10-avgust kuni sodir bo‘lgan dronlar hujumi oqibatida halok bo‘lgan O‘zbekiston fuqarolarining jasadlari O‘zbekistonga olib kelindi. Bu haqda Tashqi ishlar Vazirligi matbuot xizmati ma’lum qildi.
Hujum oqibatida Nijnekamskdagi qurilish korxonasida ishlagan 8 nafar O‘zbekiston fuqarosi halok bo‘lgan, yana bir qator yurtdoshlarimiz turli darajadagi tan jarohatlari bilan shifoxonalarga joylashtirilgan edi.
O‘zbekiston Prezidentining topshirig‘iga muvofiq tuzilgan Hukumat komissiyasi tomonidan halok bo‘lgan fuqarolarning jasadlarini Vatanga olib kelish, jabrlanganlarga tibbiy va boshqa zarur yordam ko‘rsatish hamda ularning oila a’zolarini qo‘llab-quvvatlash bo‘yicha tegishli choralar ko‘rildi.
O‘zbekistonning Rossiyadagi Favqulodda va Muxtor Elchisi B. Asadov hamda O‘zbekistonning Qozon shahridagi Bosh konsuli N. Qosimov voqea joyiga borib, mahalliy mas’ul idoralar bilan muzokaralar o‘tkazgan.
Ko‘rilgan choralar natijasida 12-avgust kuni maxsus aviareys orqali halok bo‘lgan fuqarolarning jasadlari O‘zbekistonga olib kelindi.
Tashqi ishlar vazirligi mazkur holat bilan bog‘liq barcha masalalarni, jumladan, jabrlangan fuqarolarga zarur yordam ko‘rsatish jarayonlarini Rossiya tomoni bilan hamkorlikda nazoratga olgan.
