Tomdi tuman sudi raisi lavozimiga majburan tayinlangani haqidagi xabarlar rad etildi

 

Sudyalar oliy kengashi Tomdi tuman sudi raisi Aziza Mirzayevaning lavozimga go‘yoki majburiy ravishda tayinlangani hamda uning yashash joyidan boshqa hududda faoliyat yuritgani YTHga sabab bo‘lgani haqidagi tarqalgan xabarlarga munosabat bildirdi.

 

Kengash ma’lumotiga ko‘ra, ijtimoiy tarmoqlarda marhumaning Tomdi tuman sudi raisi lavozimiga “majburiy rozilik” asosida tayinlangani haqidagi taxminlar tarqalgan. Qayd etilishicha, bu iddaolarni tasdiqlovchi ishonchli dalil yoki huquqiy asos mavjud emas.

 

Aziza Mirzayeva mazkur lavozim uchun o‘zining yozma arizasi va roziligi asosida tanlovda ishtirok etgan. Sudyalar oliy kengashining 2024-yil 18-dekabrdagi qarori bilan u sudyalik lavozimida bo‘lishning dastlabki besh yillik muddatiga Tomdi tuman sudi raisi etib tayinlangan.

 

Shuningdek, Mirzayeva sudyalik lavozimiga tayinlangan vaqtda Samarqand viloyatida u faoliyat yuritgan sudda bo‘sh sudyalik lavozimi mavjud bo‘lmagani ma’lum qilingan.

 

Kengash ta’kidlashicha, sudyalarning boshqa hududlarda faoliyat yuritishi qonunchilikda belgilangan tartibda mavjud bo‘sh lavozimlar uchun o‘tkaziladigan tanlov asosida amalga oshiriladi.

 

Shuningdek, Aziza Mirzayevaning lavozimga tayinlanishi bilan uning 15-avgust kuni sodir bo‘lgan yo‘l-transport hodisasida vafot etishi o‘rtasida sababiy bog‘liqlik mavjudligi haqida rasmiy xulosa yo‘q.

 

Hodisaning kelib chiqish sabablari va boshqa holatlariga huquqiy baho vakolatli organlar tomonidan o‘tkaziladigan tekshiruv yakunlariga ko‘ra beriladi.

 

Eslatib o'tamiz, avvalroq 15-avgust kuni Zarafshon–Tomdi avtomobil yo‘lida Aziza Mirzayeva boshqaruvidagi Cobalt yo‘l-transport hodisasiga uchragani xabar qilingan edi. Avtomobil yo‘ldan chiqib, ag‘darilishi oqibatida sudya og‘ir tan jarohatlari olib, voqea joyida vafot etgan.