Навоийда суд раиси ЙТҲда ҳалок бўлди
ЙТҲга автомобиль тезлигининг юқори бўлгани сабаб бўлган. Ҳодиса содир бўлган йўлнинг ҳолати ҳам қониқарсиз экани айтилган.
Жиноят ишлари бўйича Томди туман суди раиси Азиза Мирзаева йўл-транспорт ҳодисасида ҳалок бўлди. Бу ҳақда Kun.uz хабар берди.
Ҳодиса 15 август куни тушга яқин “Зарафшон–Томди” йўлида содир бўлган. Маълум қилинишича, Азиза Мирзаева Зарафшон шаҳридан Томди туманига Cobalt автомашинасида кетаётган бўлган.
Дастлабки маълумотларга кўра, у автомобиль бошқарувини йўқотган. Оқибатда Cobalt йўлдан чиқиб, ағдарилган. Суд раиси оғир тан жароҳатлари оқибатида воқеа жойида вафот этган.
Дастлабки тахминларга кўра, ҳодисага автомобилнинг юқори тезликда ҳаракатлангани сабаб бўлган. Шу билан бирга, ЙТҲ содир бўлган йўлнинг ҳолати ҳам қониқарсиз экани айтилмоқда.
39 ёшли Азиза Асатовна Мирзаева 2024 йил декабрь ойида Навоий вилояти жиноят ишлари бўйича Томди туман суди раиси лавозимига тайинланган. У судьялик лавозимида бўлишнинг биринчи беш йиллик муддатига тасдиқланган эди. Азиза Мирзаева икки фарзанднинг онаси бўлган.
Судьялар олий кенгаши ва Олий суд унинг вафоти муносабати билан оила аъзолари ва яқинларига таъзия билдирди.
