Birinchi qoidabuzarlik uchun tadbirkorga ogohlantirish beriladi
Fuqarolarning hayoti va sog‘lig‘iga, shuningdek, boshqa shaxslarning mol-mulkiga zarar yetmagan taqdirda, darhol jarima qo‘llanmaydi. Tadbirkorga kamchilikni bartaraf etishga 10 kun beriladi.
Prezident Shavkat Mirziyoyevning Xorazm viloyatida tadbirkorlar bilan o‘tkazilgan VI ochiq muloqotida iqtisodiy va moliyaviy jarimalarni qo‘llash bo‘yicha yangi yondashuv ma’lum qilingandi.
Biznes-ombudsmanga ko‘ra, endilikda “birinchi qoidabuzarlik uchun — ogohlantirish” tamoyili joriy etiladi. Agar qoidabuzarlik tadbirkor tomonidan birinchi marta sodir etilgan bo‘lsa, fuqarolarning hayoti va sog‘lig‘iga, shuningdek, boshqa shaxslarning mol-mulkiga zarar yetmagan taqdirda, darhol jarima qo‘llanmaydi.
Bunday holatda tadbirkorga aniqlangan kamchilikni bartaraf etish uchun 10 kun muddat beriladi.
Yangi tartib birinchi xato uchun javobgarlikni butunlay bekor qilishni anglatmaydi. Asosiy maqsad — tadbirkorni darhol jazolash o‘rniga, unga aniqlangan kamchilikni ixtiyoriy ravishda tuzatish imkonini berish.
Shuningdek, yangi yondashuv ma’muriy bosimni kamaytirish, nazorat tadbirlarini profilaktik yo‘nalishga o‘tkazish va tadbirkorlarning huquqlarini himoya qilishga qaratilgan.
Agar ogohlantirish tamoyiliga rioya qilinmagan yoki tadbirkorga asossiz ravishda jarima qo‘llangan deb hisoblansa, u Biznes-ombudsmanga murojaat qilishi mumkin.
Qayd etilishicha, yangi tartibda asosiy e’tibor tadbirkorni jazolashga emas, qoidabuzarlikni bartaraf etish va kelgusida uning takrorlanishining oldini olishga qaratiladi.
