Toshkent hayvonot bog‘ida hayvonlarga tosh otgan shaxs jarimaga tortildi
Qoidabuzar o‘z qilmishi uchun uzr so‘ragan.
Toshkent hayvonot bog‘ida hayvonlarga nisbatan nomaqbul munosabatda bo‘lgan tashrif buyuruvchining shaxsi aniqlandi. Bu haqda hayvonot bog‘i matbuot xizmati ma’lum qildi.
O‘tkazilgan choralar natijasida qoidabuzarning shaxsi aniqlanib, u o‘z qilmishi uchun uzr so‘ragan. Ichki ishlar organlari profilaktika inspektori qaroriga ko‘ra, unga 2 million 884 ming so‘m miqdorida jarima solingan.
Hayvonot bog‘i mazkur holat yuzasidan befarq bo‘lmagan fuqarolarga minnatdorlik bildirgan.
Ta’kidlanishicha, hayvonlarga nisbatan shafqatsiz munosabat qonunchilikda belgilangan javobgarlikka sabab bo‘ladi. Jonivorlarga zarar yetkazgan shaxslar qonun doirasida javobgarlikka tortiladi.
Avvalroq hayvonot bog‘iga tashrif buyurgan shaxs sher Aleks va jayralarga tosh otgani haqida xabar berilgan edi.
