Tadbirkorlarga qo‘llanadigan jarimalar o‘rtacha 2 barobarga kamaytiriladi
Bu o‘zgarish biznesga tushadigan ma’muriy bosimni kamaytirish va nazoratni profilaktikaga yo‘naltirishga xizmat qiladi.
Prezident Shavkat Mirziyoyevning Xorazmda tadbirkorlar bilan o‘tkazilgan VI ochiq muloqotida biznesga nisbatan ma’muriy bosimni kamaytirishga qaratilgan yangi yondashuvlar ma’lum qilindi.
Biznes-ombudsman ma’lumotiga ko‘ra, hozirda 51 ta idora moliyaviy jarima qo‘llash vakolatiga ega. Jarimaning bir qismi uni qo‘llagan idoraga tushishi ayrim rahbarlarda nazoratni tadbirkorlar faoliyatini tekshirish va jarima undirishga yo‘naltirish xavfini yuzaga keltirayotgani tanqid qilindi.
Shu munosabat bilan tadbirkorlarga qo‘llanadigan barcha turdagi jarimalar miqdorini o‘rtacha 2 barobarga kamaytirish taklif qilindi.
Yangi yondashuvda jarimaning asosiy vazifasi mablag‘ yig‘ish emas, balki sohada qonuniy tartib va intizomni ta’minlash hamda huquqbuzarliklarning oldini olishdan iborat bo‘lishi ko‘zda tutilmoqda.
Prezident nazorat idoralari faoliyatida tartib-intizom va profilaktikaga ustuvor ahamiyat berish zarurligini ta’kidladi. Ya’ni, tadbirkorni jazolashdan ko‘ra, qoidabuzarliklarning oldini olish va qonuniy faoliyat yuritishi uchun sharoit yaratishga e’tibor qaratiladi.
Shuningdek, ochiq muloqotda moliyaviy jarima qo‘llash vakolatiga ega idoralar faoliyatida ma’muriy bosimni kamaytirish zarurligi qayd etildi. Tadbirkorlik subyekti huquqlari buzilgan yoki asossiz jarima qo‘llangan deb hisoblasa, Biznes-ombudsmanga murojaat qilishi mumkin.
