AQSh BMT oldidagi qarzini 725 million dollarga kamaytirmoqchi
Mamlakatning tashkilotga qarzi 4 milliard dollardan ortiq ekani aytilmoqda.
AQSh ma’muriyati Birlashgan Millatlar Tashkilotiga 725 million dollar to‘lash jarayonini boshlagan. Bu haqda Reuters AQSh Davlat departamenti ma’lumotlariga tayanib xabar berdi.
Qayd etilishicha, mazkur to‘lov AQShning BMT oldidagi qarzdorligini kamaytirishga qaratilgan. Vashingtonning BMTga qarzi 4 milliard dollardan ortiq ekani aytilmoqda. Biroq AQSh tomoni o‘z hisob-kitoblarida qarzdorlik miqdorini bundan ancha past deb baholamoqda.
Mutaxassislarning fikricha, AQSh tomonidan qarzlarni to‘lash kechiktirilishi davom etsa, mamlakatning BMTdagi ovoz berish huquqi cheklanishi mumkin.
AQSh BMTning eng yirik moliyaviy donori hisoblanadi. Shu bilan birga, Vashington muntazam byudjet badallarini to‘lashni kechiktirgan hamda BMT tizimidagi tashkilotlarni ixtiyoriy moliyalashtirish hajmini qisqartirgan.
BMT esa a’zo davlatlarning to‘lovlarni kechiktirishi sababli likvidlik muammosiga duch kelmoqda. Xitoyning tashkilot oldidagi qarzi ham qariyb 455 million dollarni tashkil etishi qayd etilgan.
Eslatib o'tamiz, avvalroq AQSHning jami davlat qarzi 40,047 trillion dollarga yetgani xabar qilingan edi.
