“Stadionni qanday qilib yo‘q qilib yuboryapsan?” — Surxondaryo hokimi
Ulug‘bek Qosimov maktab stadionlari o‘rnida qo‘shimcha binolar qurilayotganini tanqid qilib, maktab hududlaridan foydalanishda mas’uliyatli yondashuvni talab qildi.
Surxondaryo viloyati hokimi Ulug‘bek Qosimov Oltinsoy tumanida fuqarolar qabuli davomida maktab hududlaridagi futbol stadionlari va sport maydonlarining qisqarib borayotgani masalasiga e’tibor qaratdi.
Viloyat hokimligi tomonidan 20-avgust kuni e’lon qilingan videolavhada Ulug‘bek Qosimov ayrim maktablarda stadionlar o‘rnida qo‘shimcha binolar qurilayotganini tanqid qilgan.
Hokimning ta’kidlashicha, maktab stadionlari o‘quvchilarning sport bilan shug‘ullanishi, bo‘sh vaqtini mazmunli o‘tkazishi va sog‘lom turmush tarzini shakllantirishida muhim o‘rin tutadi.
“Stadionni yo‘q qilib, yangi qo‘shimcha bino qurdirib yuboryapti. Men aytyapman: sen stadionda futbol o‘ynamaganmisan? Maktabda o‘qimaganmisan? Stadionni qanday qilib yo‘q qilib yuboryapsan? Futbol juda ham kerak. Hammamiz futbol o‘ynab katta bo‘lganmiz”, — degan Ulug‘bek Qosimov.
Viloyat rahbari bolalik davrini misol qilib, maktabdagi darslar bo‘lmagan paytlarda o‘quvchilar stadionga chiqib, futbol o‘ynaganini ta’kidlagan.
“Stadionga chopardik, dars bo‘lmay qolsa, hamma yalangoyoq futbol o‘ynardik. Shuni yo‘q qilgandan keyin hamma telefon o‘ynaydi-da hozir, boshqa nima qiladi?” — deya ta'kidlagan hokim.
Ulug‘bek Qosimov, ayniqsa, maktab hududlaridan foydalanish masalasida mas’ullarni ehtiyotkor va mas’uliyatli yondashishga chaqirgan. Uning ta’kidlashicha, ta’lim muassasalarining mavjud infratuzilmasi, jumladan, sport maydonlari o‘quvchilar manfaatidan kelib chiqib asrab-avaylanishi lozim.
“Maktab bilan birontang hazillashma. Maktab — juda ham ulug‘ dargoh”, — degan Surxondaryo viloyati hokimi.
Shuningdek, Ulug‘bek Qosimov avvalroq o‘tkazilgan yig‘ilishlardan birida hududdagi yo‘llarning holati, temir yo‘l vagonlarining ahvoli, shuningdek, poyezd va samolyot chiptalari tariflari bilan bog‘liq masalalarni ham tanqid qilgan edi.
