Suriya Makka kelishuviga qo‘shilishi mumkin
Hozircha bu borada yakuniy qaror qabul qilinmagan.
Suriya Saudiya Arabistoni, Turkiya va Pokiston tomonidan imzolangan Makka o‘zaro mudofaa kelishuviga qo‘shilish imkoniyatini ko‘rib chiqmoqda. Biroq hozircha bu borada yakuniy qaror qabul qilinmagan.
Bu haqda Suriya tashqi ishlar vaziri Asad ash-Shayboniy Pokistonga rasmiy tashrifi yakunlari bo‘yicha jurnalistlarga ma’lum qildi.
Vazirning ta’kidlashicha, Damashq Makka mudofaa kelishuviga qo‘shilish variantlarini o‘rganmoqda. Ayni paytda Suriya tashqi siyosatida mamlakatni qayta qurish, iqtisodiy hamkorlikni rivojlantirish hamda xalqaro va mintaqaviy aloqalarni mustahkamlashga ustuvor ahamiyat berilmoqda.
Isroil bilan munosabatlarga to‘xtalgan ash-Shayboniy strategik kelishuv masalasini muhokama qilish uchun hozircha erta ekanini bildirgan. Uning so‘zlariga ko‘ra, Isroil hujumlariga chek qo‘yish Damashq uchun ustuvor vazifa bo‘lib qolmoqda.
Ash-Shayboniy 19-avgust kuni Suriya delegatsiyasiga boshchilik qilib, Pokistonga tashrif buyurgan. Bu Suriya tashqi ishlar vazirining so‘nggi 19 yil ichida Pokistonga amalga oshirgan ilk tashrifi bo‘ldi.
Makka o‘zaro mudofaa kelishuvi 7-avgust kuni Saudiya Arabistoni, Turkiya va Pokiston tomonidan imzolangan. Kelishuvga ko‘ra, a’zo davlatlardan biriga uyushtirilgan qurolli hujum barcha ishtirokchilarga qarshi tajovuz sifatida baholanishi belgilangan.
