“Urush davom etayotgan paytda saylov o‘tkazish Ukrainani parchalab yuboradi” – Zelenskiy

 
Ukraina prezidenti Vladimir Zelenskiy Rossiya bilan urush davom etayotgan bir paytda mamlakatda saylov o‘tkazish Ukrainani ichidan bo‘lib yuborishi va davlatni zaiflashtirishi mumkinligini bildirdi. Bu haqda Reuters xabar berdi.

 

Prezident bu fikrni sobiq mudofaa vaziri Mixaylo Fedorovning urush sharoitida saylov o‘tkazish haqidagi chaqirig‘iga javoban bildirgan. Fedorovning o‘tgan hafta saylov o‘tkazish taklifi Ukraina siyosatida urush boshlanganidan beri amaldagi prezidentga nisbatan eng jiddiy ichki chaqiriqlardan biri bo‘lgandi.

 
Zelenskiy urush sharoitidagi saylov mamlakatdagi mavjud siyosiy va ijtimoiy bo‘linishlarni kuchaytirishi mumkinligini ta’kidlagan. Uning aytishicha, hozirgi vaziyatda saylov o‘tkazish “davlat uchun sunami” bo‘lib, Ukrainani bo‘lib yuborishi mumkin.

 
Ukrainada harbiy holat amal qilayotgan davrda saylov o‘tkazish qonunchilik bilan taqiqlangan. Bundan tashqari, mamlakat hududining bir qismi Rossiya nazoratida ekani, millionlab ukrainaliklar xorijda yashayotgani va ko‘plab fuqarolar frontda xizmat qilayotgani saylovni tashkil etish bilan bog‘liq jiddiy muammolarni yuzaga keltirgan.

 
Zelenskiyning ta’kidlashicha, agar xalqaro hamkorlar saylovlar vaqtida mamlakat xavfsizligini kafolatlay olsa, bunday jarayonni o‘tkazish imkoniyati ko‘rib chiqilishi mumkin. Biroq hozircha bunday kafolatni taqdim etish bo‘yicha hech qanday aniq reja taklif qilinmagan.

 
Ukraina prezidentining aytishicha, hozirgi asosiy vazifa saylovga tayyorgarlik ko‘rish emas, balki urushni yakunlash va mamlakatning mustaqilligi hamda suverenitetini saqlab qolishdan iborat.

 
Shu bilan birga, Kyiv xalqaro sotsiologiya instituti 5-avgust kuni o‘tkazgan so‘rovda ukrainaliklarning 57 foizi saylovlar faqat urush tugaganidan keyin o‘tkazilishini ma’qul ko‘rgan.