AQSh immigratsion viza arizalarini ko‘rib chiqishni to‘xtatdi
Davlat departamenti bu chorani global o‘quv tadbiri bilan izohladi.
Donald Tramp ma’muriyati immigratsiya siyosatini kuchaytirish doirasida immigratsion vizalarga oid arizalarni ko‘rib chiqishni vaqtincha to‘xtatdi. Bu haqda Reuters AQSh Davlat departamenti vakiliga tayanib xabar berdi.
Davlat departamenti ma’lumotiga ko‘ra, AQShning butun dunyo bo‘ylab barcha elchixona va konsulliklarida global o‘quv tadbiri boshlangan. Shu munosabat bilan viza xizmatlarini ko‘rsatish tartibiga tegishli o‘zgartirishlar kiritilgan va ular trening yakunlangunga qadar amal qiladi.
Reuters qayd etishicha, mazkur choralar Tramp ma’muriyatining deportatsiya va immigratsiya siyosatini kuchaytirishga qaratilgan keng ko‘lamli kampaniyasi doirasida amalga oshirilmoqda. So‘nggi davrda AQSh rasmiylari turli sabablarga ko‘ra vizalar va doimiy yashash huquqini bekor qilish holatlarini ham kuchaytirgan.
Avvalroq, AQSh ma’muriyati boshpana so‘ragan yoki boshpana olish jarayonida bo‘lgan 200 minggacha xorijlikning B1/B2 turistik va biznes vizalarini bekor qilishni rejalashtirayotgani haqida xabar berilgan edi.
Shuningdek, AQSh Davlat departamenti so‘nggi 18 oy davomida jinoyatlarda ayblangan yoki sudlangan, shuningdek, AQSh siyosatini ochiq tanqid qilgan ayrim shaxslarning vizalarini bekor qilgan.
AQSh ma’muriyati viza bekor qilish mexanizmidan immigratsiya siyosatini amalga oshirish hamda mamlakat xavfsizligiga tahdid solishi mumkin bo‘lgan xorijiy fuqarolarni aniqlash vositasi sifatida foydalanishda davom etishini bildirgan.
