Rossiya qit’alararo ballistik raketaning o‘quv parvozini amalga oshirdi
Raketaning o‘quv jangovar bloklari Kamchatkadagi “Kura” poligoniga yo‘naltirilgan.
Rossiya Mudofaa vazirligi Plesetsk kosmodromidan qattiq yoqilg‘ili qit’alararo ballistik raketaning o‘quv-jangovar uchirilishi amalga oshirilganini ma’lum qildi. Bu haqda “Meduza” xabar berdi.
Vazirlik xabariga ko‘ra, raketaning o‘quv jangovar bloklari Kamchatka yarimorolidagi “Kura” poligonining belgilangan hududiga yetib borgan.
Mudofaa vazirligi uchirishdan maqsad raketa majmuasining taktik-texnik va parvoz xususiyatlarini tasdiqlash bo‘lganini bildirdi.
Qayd etilishicha, 2026-yil may oyida ham Plesetsk kosmodromidan Kamchatkadagi “Kura” poligoni tomon “Yars” qit’alararo ballistik raketasi uchirilgan.
Rossiya Mudofaa vazirligi ushbu uchirishda qo‘llangan raketaning aniq turini ma’lum qilmagan.
