“Kalmar o‘yini” ta’siridagi ikki o‘smir 12 yoshli bolani o‘ldirdi
Qotillikda gumonlanib qo‘lga olingan o‘smir qizlarning yonidan 50 kishining ismi kiritilgan ro‘yxat topilgan.
Rossiyaning Moskva viloyatida 12 yoshli maktab o‘quvchisi o‘ldirildi. Qotillikda 15 va 16 yoshli ikki nafar o‘smir qiz gumonlanib, ular qo‘lga olingan. Meduza xabariga ko‘ra, qizlar jinoyatni Janubiy Koreyaning “Kalmar o‘yini” serialidan ta’sirlangan holda sodir etgan bo‘lishi mumkin.
12 yoshli bola 26-avgust kuni Kabanovo qishlog‘ida bedarak yo‘qolgan. Uni qidirishga ko‘ngillilar ham jalb etilgan. Ertasi kuni uning jasadi ko‘plab pichoq jarohatlari bilan tashlandiq binoning yerto‘lasidan topilgan. Mazkur bino ilgari mahalliy kasb-hunar bilim yurti yotoqxonasi bo‘lgan.
Ko‘p o‘tmay, jinoyatni sodir etishda gumonlanib, 15 va 16 yoshli ikki qiz qo‘lga olingan. Tergovchilar qotillik bo‘yicha jinoyat ishi qo‘zg‘atgan.
OAV va Telegram-kanallar huquq-tartibot idoralaridagi manbalarga tayanib, qizlar qotillikni oldindan rejalashtirgani haqida xabar bermoqda. Ular pichoqlar va qo‘lqoplarni oldindan tayyorlagan. Qizlar bolani bir qishloqda yashaydigan qo‘shnisi sifatida tanigan.
Bola yo‘qolgan kuni ular uni pivo ichish bahonasi bilan sayrga taklif qilib, tashlandiq binoga olib borgan. “Komsomolskaya pravda” nashrining politsiyadagi manbasiga ko‘ra, qizlar odamlarning qanday o‘lishini ko‘rmoqchi bo‘lgan.
Ayrim manbalarda qizlar qotillikni telefonga tasvirga olgani va bu qandaydir video-chellenjning bir qismi bo‘lgani aytilmoqda. Boshqa manbalarga ko‘ra esa, ular izlarni yashirish uchun telefonlarini ataylab o‘zlari bilan olib ketmagan. Jinoyatdan so‘ng qizlar uylariga qaytgan.
Halok bo‘lgan bolaning onasi Irina “MSK1” nashriga bergan intervyusida qizlar boshqa qotilliklarni ham rejalashtirganini aytgan. Uning so‘zlariga ko‘ra, tergov ko‘rib chiqayotgan versiyalardan biri qizlarning Janubiy Koreyaning “Kalmar o‘yini” serialidan ta’sirlangan bo‘lishi bilan bog‘liq.
“Kalmar o‘yini” serialida qahramonlar omon qolish uchun shafqatsiz o‘yinlarda bellashadi. Irinaning aytishicha, tergovchilar bunday taxminga qizlardan birining xonasida serialga oid plakatlar bo‘lgani sabab kelgan.
Shuningdek, gumondorlardan birining TikTok sahifidan serialdagi qotilliklar aks etgan videolavha topilgani xabar qilingan.
Kabanovo qishlog‘i aholisidan biri esa ikki qizni “bosiq va janjalkash bo‘lmagan” deb ta’riflagan. Uning aytishicha, qizlar bir-biri bilan yaqin munosabatda bo‘lgan va tez-tez birga vaqt o‘tkazgan.
Mahalliy ayolning so‘zlariga ko‘ra, qizlarning yonidan 50 kishining ismi kiritilgan ro‘yxat topilgan. Unda halok bo‘lgan bola ham bo‘lgan. U qizlarning hech qanday submadaniyatga, jumladan, satanizmga aloqasi bo‘lmaganini, biroq “Kalmar o‘yini”ga juda berilib ketganini aytgan.
REN nashri huquq-tartibot idoralariga yaqin manbalarga tayanib, gumondorlardan biri so‘roq paytida uzoq vaqtdan beri qon nimaligini va odam o‘ldirish qanday bo‘lishini bilishni istaganini tan olganini yozdi.
Hozirda tergov davom etmoqda.
