Misr qirolichasi Nazli taqqan millionlab dollarlik marjon Vena muzeyidan o‘g‘irlandi
Bir necha million dollarga baholangan taqinchoqni ikki erkak olib qochgan.
Misrning sobiq qirolichasi Nazliga tegishli bo‘lgan, 673 ta qimmatbaho tosh bilan bezatilgan marjon Venadagi Amaliy san’at muzeyidan (MAK) o‘g‘irlandi. Bu haqda Al Arabiya xabar berdi.
Taqinchoqning qiymati bir necha million dollarga baholanmoqda.
Politsiya ma’lumotiga ko‘ra, ikki erkak muzeyga kirish uchun chipta sotib olgan. Keyin ular bolg‘a yordamida marjon joylashtirilgan shisha vitrinasini sindirib, taqinchoqni olib qochgan. Gumondorlar niqob taqmagan va kuzatuv kameralariga tushgan.
O‘g‘irlangan marjon Van Cleef & Arpels kompaniyasining fransuz dizaynerlariga bag‘ishlangan ko‘rgazmada namoyish etilayotgan edi. Ko‘rgazmada iyun oyidan buyon qariyb 500 ta buyum taqdim etilgan.
Marjon Misrning sobiq qirollik oilasi uchun yaratilgan. Qirolicha Nazli uni 1939-yilda qizi Favziya va Eronning bo‘lajak shohi Muhammad Rizo Pahlaviyning nikoh to‘yida taqqan.
Van Cleef & Arpels kompaniyasi o‘z saytida mazkur taqinchoqni “oq zargarlik san’atining tantanasi” deb ta’riflagan.
MAK muzeyi o‘g‘irlikni tasdiqlagan, biroq tergov davom etayotgani sababli qo‘shimcha izoh bermagan. Politsiya gumondorlarni qidirishni davom ettirmoqda.
Mazkur o‘g‘irlik Yevropa muzeylarida so‘nggi vaqtlarda yuz bergan qator yirik talonchiliklarning navbatdagisi bo‘ldi.
Xususan, avvalroq Ispaniyaning Alikante provinsiyasidagi Villena arxeologiya muzeyidan bronza davriga oid “Villena xazinasi”ning katta qismi o‘g‘irlab ketilgandi. O‘g‘irlangan oltin buyumlarning qiymati kamida 1,7 million yevroni tashkil etadi.
2025-yilda esa Luvr muzeyi o‘g‘rilar hujumiga uchragandi. Hodisa natijasida u yerdan bir nechta qadimiy zargarlik buyumlari, jumladan, Fransiya qirollari va imperatorlariga tegishli toj, marjon va tilla buyumlar o‘g‘irlangan.
